महागाईचा भडका! सीएनजीवर वाहन चालवणं आता आणखी महागलं

नवी दिल्ली : देशात सध्या महागाईचा भडका उडाला आहे. पेट्रोल (Petrol) आणि डिझेलच्या (Diesel) दरवाढीमुळे नागरिक त्रस्त झाले आहेत. यामुळे स्वस्त इंधन पर्याय म्हणून वाहनचालकांकडून सीएनजीला (CNG) पसंती दिली जात होती. मात्र, आता सीएनजीवर गाडी चालवणेही महाग झाले आहे. सीएनजीच्या दरात पुन्हा एकदा वाढ करण्यात आली आहे. चालू वर्षात सीएनजीच्या दरात तब्बल 16 रुपयांनी वाढ झाली आहे. केंद्र सरकारने नैसर्गिक वायूच्या दरात तब्बल 62 टक्के वाढ केल्याने सीएनजीचा दर सातत्याने वाढत आहे.

सीएनजीच्या दरात मुंबईत वाढ करण्यात आली आहे. महानगर गॅसने ही दरवाढ काल मध्यरात्रीपासून लागू केली आहे. सीएनजीच्या दरात मुंबईत चालू वर्षात तब्बल 16 रुपयांची वाढ करण्यात आली आहे. यामुळे सीएनजीवर वाहन चालवणाऱ्या 8 लाख वाहनचालकांना मोठा फटका बसू लागला आहे. तीन आठवड्यांत महानगर गॅसने केलेली ही दुसरी दरवाढ आहे. मुंबईत सीएनजीच्या दरात प्रतिकिलो 2 रुपयांची वाढ केल्याने तो आता 63.50 रुपयांवर पोचला आहे.

केंद्र सरकारने नैसर्गिक वायूच्या दरात तब्बल 62 टक्के वाढ केली आहे. यामुळे सीएनजीच्या दरात सातत्याने वाढ सुरू आहे. याचा सर्वाधिक फटका टॅक्सी, बस आणि रिक्षांसोबत खासगी कारचालकांना होत आहे. स्वस्त इंधनाचा पर्याय म्हणून सीएनजीकडे वळणाऱ्या वाहनचालकांना आता मोठा भुर्दंड यामुळे बसू लागला आहे. सीएनजीच्या दरवाढीमुळे मुंबईत टॅक्सी आणि रिक्षा संघटना आता भाडेवाढ करण्याची मागणी करू लागल्या आहेत.

स्वयंपाकाच्या गॅस सिलिंडरच्या (LPG Cylinder) दरातही वाढ सुरू आहे. चालू वर्षात एलपीजी सिलिंडरच्या दरात तब्बल 205 रुपयांची वाढ झाली आहे. दिल्ली आणि मुंबईत विनाअंशदानित गॅस सिलिंडरची किंमत 900 रुपयांवर पोचली आहे. दरम्यान, मोदी सरकारने 4 नोव्हेंबरला पेट्रोलवरील उत्पादन शुल्कात (Excise Duty) 5 रुपये आणि डिझेलवरील उत्पादन शुल्कात 10 रुपये कपात केली आहे. यानंतर पेट्रोलियम कंपन्यांनाही दरवाढ थांबवली आहे. दिल्ली पेट्रोलचा दर दिल्लीत 95.41 रुपये असून, डिझेलचा दर 86.67 रुपये लिटर आहे. मुंबई पेट्रोलचा दर 109.98 रुपये आणि डिझेलचा दर 94.14 रुपये आहे.