आर्यन प्रकरण वानखेडेंना भोवणार; मुदतवाढीऐवजी नवीन वर्षात दीर्घ सुटी?

मुंबई : क्रूझ पार्टी (Cruise Party) प्रकरणाच्या तपासावरच उच्च न्यायालयाने गंभीर प्रश्न उपस्थित केले आहेत. यामुळे अमली पदार्थ प्रतिबंधक विभागाचे (NCB) विभागीय संचालक समीर वानखेडे (Sameer Wankhede) अडचणीत आले आहेत. वानखेडेंना आधी दिलेली 4 महिन्यांची मुदतवाढ 31 डिसेंबरला संपत असून, ते त्यानंतर दीर्घ रजेवर जाणार असल्याची मााहिती सूत्रांनी दिली.

सूत्रांनी दिलेल्या माहितीनुसार, समीर वानखेडे यांचा एनसीबीतील कार्यकाळ 31 डिसेंबरला संपत आहे. अद्याप वानखेडे यांनी कार्यकाळ वाढवण्यासाठी अर्ज केलेला नाही. तसेच, मुदतवाढीबाबत मुख्य कार्यालयातूनही त्यांना काहीही सांगण्यात आलेले नाही. वानखेडे यांना ऑगस्ट महिन्यांत 4 महिन्यांची मुदतवाढ मिळाली होती. आता त्यांना मुदतवाढ मिळण्याची शक्यता नाही. त्यामुळे वानखेडे हे एनसीबीचा कार्यकाळ संपल्यानंतर दीर्घ रजेवर जाणार आहेत.

उच्च न्यायालयाच्या आदेशात एनसीबीकडे कोणतेही पुरावे नसल्याची बाब अधोरेखित करण्यात आली होती. आदेशात म्हटले होते की, आर्यन, अरबाझ आणि मुनमुन यांच्या विरोधात त्यांनी अमली पदार्थांसाठी कट आखल्याचे कोणेतेही पुरावे नाहीत. याचबरोबर त्यांच्या व्हॉट्सअॅप चॅटमध्येही काही आक्षेपार्ह आढळलेले नाही. या आरोपींनी समान हेतू ठेवून बेकायदा कृत्य केल्याचा एकही पुरावा न्यायालयासमोर आलेला नाही. ते तिघे एका क्रूझमधून प्रवास करीत होते म्हणून त्यांना कटाचा भाग ठरवणे शक्य नाही. तसेच, तिघांची वैद्यकीय तपासणीही करण्यात आली नव्हती. त्यामुळे संबंधित वेळी त्यांनी अमली पदार्थांचे सेवन केले होते हेसुद्धा स्पष्ट होत नाही.

तपास अधिकाऱ्यांनी आरोपींच्या घेतलेल्या कबुलीजबाबावर एनसीबी विसंबून राहू शकत नाही. कारण हे कबुलीजबाब न्यायालयात ग्राह्य धरले जात नाहीत, असेही उच्च न्यायालयाने आदेशात म्हटले होते. उच्च न्यायालयानेच आता एनसीबीच्या तपासावर अनेक प्रश्न उपस्थित केले आहेत. त्यामुळे या प्रकरणाचा तपास करणारे समीर वानखेडे हे अडचणीत आले आहेत. वानखेडे यांच्यावर अनेक गंभीर आरोप झाल्यानंतर त्यांच्याकडून हा तपास सध्या काढून घेण्यात आला आहे. तसेच, त्यांची खातेअंतर्गत चौकशी सुरू आहे.