Election Commission News : एबी फॉर्मवरील डिजिटल सही अनेक उमेदवारांचा घात करणार? शिवसेनेने उचललं मोठं पाऊल

AB Forms irregularities : महापालिका निवडणुकीसाठी उमेदवारी अर्ज दाखल झाल्यानंतर आज त्याची छाननीही पार पडली. आता पुढील दोन दिवस उमेदवारी अर्ज मागे घेता येणार आहेत. पण त्याआधीच शिवसेनेने मोठा दावा करत अनेक उमेदवारांची धडधड वाढविली आहे. अनेक पक्षांच्या उमेदवारांच्या ए व बी फॉर्मवर डिजिटल सही असून ते बेकायदेशीर आहे. त्यामुळे त्यांची उमेदवारी रद्द करावी, अशी मागणी शिवसेनेने थेट राज्य निवडणूक आयोगाकडे केली आहे.

शिवसेनेचे राज्यसभेचे खासदार मिलिंद देवरा यांनी निवडणूक आयोगाला पत्र पाठवून ही बाब निदर्शनास आणून दिली आहे. महापालिका निवडणुकांसाठी उमेदवारी अर्ज दाखल करण्याच्या अखेरच्या दिवशी बहुतांश पक्षांनी निवडणूक आयोगाच्या नियमांचं थेट उल्लंघन केल्याचे निदर्शनास आल्याचे देवरा यांनी पत्रात म्हटले आहे.

काही पक्षांकडून उमेदवारांना दिल्या जाणाऱ्या फॉर्म ए आणि फॉर्म बी वर डिजिटल सिग्नेचर (डिजिटल स्वाक्षरी) करण्यात आली आहे. मात्र, अशी डिजिटल सही देणं हे निवडणूक आयोगाच्या नियमांचं उल्लंखन आहे. राजकीय पक्षांकडून दिले जाणारे ए आणि बी फॉर्म असे डिजिटल सिग्नेचरमार्फत अधिकृत केले जाऊ शकत नाहीत, अशी मुद्दा देवरा यांनी उपस्थित केला आहे.  

देवरा यांनी अशा फॉर्मचा गैरवापर होऊ शकतो, अशी भीतीही त्यांनी व्यक्त केली आहे. यासंदर्भात देवरा यांनी राज्य निवडणूक आयोगाला पत्र देऊन हरकत घेतली आहे. तसेच, अशा उमेदवारांची उमेदवारी देखील रद्द करण्याची त्यांनी मागणी केली आहे. राज्य निवडणूक आयोगाने या प्रकाराची तात्काळ दखल घ्यायला हवी, असे शिवसेनेने म्हटले आहे.

दरम्यान, उमेदवारी अर्ज दाखल करण्याच्या अखेरच्या दिवशी राजकीय पक्षांसह इच्छूकांची चांगलीच दमछाक झाली. एबी फॉर्म मिळविण्यापासून अर्ज दाखल करेपर्यंत धावपळ दिसून आली. काही उमेदवारांना घाईगडबडीत देण्यात आलेल्या ए व बी फॉर्मवर डिजिटल सह्या केलेल्या असू शकतात, असा मुद्दा देवरा यांनी उपस्थित केला आहे. त्यामुळे आता निवडणूक आयोगाकडून देवरा यांच्या मागणीची दखल घेऊन फॉर्मची पडताळणी केली जाणार का, याबाबत उत्सुकता वाढली आहे.