Jitendra Awhad : जितेंद्र आव्हाडांच्या कुटुंबियांना धमकी; महेश आहेर यांच्यावर मोठी कारवाई

NCP News : राष्ट्रवादीचे नेते जितेंद्र आव्हाड यांच्या कुटुंबियांना काही दिवसांपूर्वी धमकी देण्यात आल्याचा प्रकार समोर आला होता. या प्रकरणी राज्य सरकारने ठाणे महानगरपालिकेतील अधिकारी महेश आहेर यांच्यावर मोठी कारवाई केली आहे.

या धमकीप्रकरणी अधिकारी महेश आहेर यांच्यावरील आरोपांची चौकशी होईपर्यंत त्यांचा कार्यभार काढून घेतला जाईल, अशी घोषणा मंत्री उदय सामंत यांनी विधिमंडळात केली.

आव्हाडांच्या कुटुंबियांना धमकी देण्याची महेश आहेर यांची कथित ऑडिओ क्लिप व्हायरल झाली होती. त्यानंतर आव्हाडांनी महेश आहेर यांच्यावर गंभीर आरोप केले होते.

या प्रकरणी आज विधिमंडळात विरोधकांनी प्रश्न उपस्थित केले. तसेच इतके वर्ष महेश आहेर यांची ठाण्यात एकाच जागी नियुक्ती कशी? त्यांचे तात्काळ निलंबन करणार का? त्यांच्यावरील गुन्हे सिद्ध झाल्यास काय कारवाई करणार? असे अनेक प्रश्न अनिल परबांनी सभागृहात उपस्थित केले.

त्यानंतर अधिकारी महेश आहिर यांची चौकशी सुरू असे पर्यंत कार्यभार काढून घेतला जाईल, अशी घोषणा उदय सामंतांनी केली. दरम्यान, काही दिवसांपूर्वी आव्हाडांच्या मुलीला व जावयाला मारण्याची धमकी देणारी ऑडिओ क्लिप व्हायरल झाली होती. त्यानंतर जितेंद्र आव्हाड यांच्या कार्यकर्त्यांनी आहेर यांना मारहाण केली होती.