Maratha Reservation: मराठा आरक्षणाबाबत मोठी बातमी! सातारा गॅझेट लागू होण्याची शक्यता; लवकरच निघणार आदेश?

Maratha Reservation: मुंबईत आझाद मैदानावर मराठा आंदोलक मनोज जरांगे यांचं उपोषण दोन प्रमुख अटीशर्तींनंतर मागे घेण्यात आलं होतं. यांपैकी एक अट म्हणजे हैदराबाद गॅझेट आणि सातारा गॅझेट लागू करणे. यांपैकी हैदराबाद गॅझेटनुसार मराठवाड्यातील मराठा समाजातील ज्या जुन्या कुणबी नोंदी आहेत त्यांना कुणबी दाखले दिले जात आहेत. त्यानंतर आता दुसरी अट असलेल्या सातारा गॅझेट लागू करण्याच्या हालचाली सुरु झाल्या आहेत. याचं अधिकृत नोटिफिकेशन लवकरच निघणार असल्याचं सुत्रांकडून कळतं आहे. कारण मराठा आरक्षण विषय उपसमितीच्या नुकत्याच पार पडलेल्या बैठकीत याबाबत निर्णय झाला असल्याची माहिती आहे.

सातारा गॅझेट लागू झाल्यानंतर पश्चिम महाराष्ट्रातील मराठी समाजाला ज्यांच्या या गॅझेटनुसार कुणबी नोंदी आहेत त्यांना कुणबी प्रमाणपत्रे मिळू शकणार आहेत. त्यामुळं मनोज जरांगे यांची ही दुसरी मागणीही मान्य होणार असल्याची चिन्ह आहेत. पण सध्या तातडीनं याबाबतचा आदेश किंवा नोटीफिकेशन निघू शकत नाही. त्यासाठी जिल्हा परिषदेच्या निवडणुकांचा अडथळा असल्याचं सांगितलं जात आहे. सातारा जिल्हा परिषदेची निवडणूक पार पडल्यानंतर तातडीनं सातारा गॅझेटियर लागू करण्याचा निर्णय होऊ शकतो.

दरम्यान, अध्यक्ष राधाकृष्ण विखे पाटील यांच्या अध्यक्षतेखाली मराठा आरक्षण विषयक उपसमितीची आज मंत्रालयात बैठक पार पडली. या बैठकीत सातारा गॅझेट लागू करण्यावर शिक्कामोर्तब झालं आहे. त्यामुळं आता जरांगेंच्या आंदोलनाला निर्णायक यश मिळालं असल्याचं बोललं जात आहे.