Manoj Jarange Patil : "मुख्यमंत्र्यांशी चर्चा झाली, 'ते' सर्व देण्याची सरकारची भूमिका, पण..."; मनोज जरांगेंच्या आंदोलनावर एकनाथ शिंदेंची पहिली प्रतिक्रिया

Mumbai News, 29 Aug : मराठा आरक्षण आंदोलक मनोज जरांगे पाटील यांनी आजपासून मुंबईतील आझाद मैदानात बेमुदत उपोषणाला सुरूवात केली आहे. सरकार आमच्या सर्व मागण्या मान्य करत नाही तोपर्यंत मुंबई सोडणार नाही, प्रसंगी गोळ्या खाव्या लागल्या तरी आता मागे हटणार नाही, असा इशारा त्यांनी सरकारला दिला.

जरांगे यांना पाठिंबा देण्यासाठी हजारो मराठा आंदोलक मुंबईत दाखल झालेत. या आंदोलनाला शरद पवार आणि अजित पवारांच्या राष्ट्रवादीतील अनेक नेत्यांनी पाठिंबा दिला आहे. ठाकरेंच्या शिवसेनेने देखील आंदोलनाला पाठिंबा दिला आहे.

दरम्यान, मराठा आंदोलनावर मुख्यमंत्री देवेंद्र फडणवीसांनी आपली भूमिका स्पष्ट केली. मात्र, उपमुख्यमंत्री एकनाथ शिंदे का बोलत नाहीत? असा सवाल अनेकांकडून उपस्थित केला जात होता. अशातच आता एकनाथ शिंदेंनी देखील मराठा आंदोलनावर प्रतिक्रिया दिली आहे.

"आम्ही मराठा समाजाला जे-जे देता येईल ते देण्याचा प्रयत्न केला आहे. शिवाय यापुढेही मराठा समाजाला जे देणं शक्य आहे ते देण्यासाठी सरकार सकारात्मक आहे. मात्र, यामध्ये दुसऱ्या समाजाचं नुकसान होणार नाही, याची देखील काळजी घेतली पाहिजे," असं एकनाथ शिंदे म्हणाले.

मनोज जरांगे यांच्या मराठा आंदोलना संदर्भात माध्यमांशी बोलातना एकनाथ शिंदे म्हणाले, "मराठा समाजाला शासन म्हणून आम्ही जे-जे काय देण्याचा प्रयत्न केले ते सर्व समाजासमोर आहे. 2016-2017 साली देखील देवेंद्र फडणवीस मुख्यमंत्री असताना आरक्षण दिलं. ते हायकोर्टात टिकलं. मात्र, सुप्रीम कार्टात या आरक्षणाच्या विरोधात काही लोक गेले आणि मविआ सरकारने कोर्टात नीट बाजू न मांडल्यामुळे ते आरक्षण टीकलं नाही.

आघाडीतील नेत्यांनी आरक्षणाकडे योग्य पद्धतीने लक्ष दिलं नाही. मात्र, त्यानंतर मी मुख्यमंत्री झाल्यावर 10 टक्के आरक्षण दिलं. त्यामुळे माझी मराठा समाजाला विनंती आहे की, सरकार म्हणून आम्हाला जे-जे काही करता येईल ते आम्ही केलं आहे आणि यापुढेही करू. पण समाजा समाजामध्ये तेढ निर्माण होणार नाही, ओबीसी समाजाचं कमी करून मराठा समाजाला मिळावं अशी मराठ्यांची देखील भूमिका नाही.

त्यामुळे एका समाजाचं आरक्षण काढून दुसऱ्याला देणं करता येणार नाही. मात्र, जे योग्य आहे, कायद्याच्या चौकटीमध्ये आणि नियमामध्ये बसत असेल ते सर्व देण्याची सरकारची भूमिका आजही आहे. ओबीसी समाजाला जे फायदे मिळतात ते देखील मराठा समाजाला मिळत आहेत. आर्थिक मागासलेल्या मराठ्यांना दिलेलं आरक्षण टिकलं पाहिजे ही सरकारची भूमिका आहे.

शिवाय आंदोलकांच्या ज्या सूचना आहेत त्याचा विचार देखील सरकार करेल. मुख्यमंत्री आणि आमची चर्चा झाली असून मराठा समाजाला जे कायद्याच्या चौकटीत आहे ते देण्याची इच्छा आमची आहे. पण कुणाचंही कमी न करता, नुकसान न करता जे शक्य आहे ते देणार," असं एकनाथ शिंदेंनी यावेळी स्पष्ट केलं.

तसंच यावेळी मनोज जरांगे यांनी गोळ्या घातल्या तरी मुंबईतून जाणार नाही, असं म्हटलं आहे. या संदर्भात प्रश्न विचारताच शिंदे म्हणाले, गोळ्या घालण्याचं काम सरकारचं नाही. हे सर्वसामान्यांचं सरकार आहे. जे आज टिका करत आहेत ते मुख्यमंत्री असताना दिलेलं आरक्षण टिकवू शकले नाहीत. आम्ही जेव्हा बैठकीला बोलवायचो तेव्हा ते बैठकीला येत नव्हते. दुटप्पी भूमिका घेऊ नका, स्पष्ट भूमिका घ्या. शिवाय मराठा समाजाचं आंदोलन झालं तेव्हा सामनातून टिंगल कोणी केली होती? असा सवाल करत शिंदेंनी उद्धव ठाकरेंवर निशाणा साधला.