Manoj Jarange Patil : "तुम्ही जाम केलेली मुंबई दोन तासात मोकळी झाली पाहिजे..."; आझाद मैदानात पाय ठेवताच जरागेंचं मराठ्यांना आवाहन

Manoj Jarange Patil Azad Maidan Protest : मागील अनेक दिवसांपासून मनोज जरांगे पाटील आझाद मैदानात जाणार की नाही याबाबतच्या चर्चा सुरू होत्या. अखेर आज शुक्रवारी (ता.29) जरांगे पाटील हजारो समर्थकांसह आझाद मैदानात दाखल झालेत.

बुधवारी रात्रीपासून आलेले मराठे जरांगेची वाट पाहात होते. शिवाय ते काय बोलणार याकडे संपूर्ण राज्यातील मराठ्यांचं लक्ष लागलं होतं. त्यानंतर आता जरागेंनी आझाद मैदानात पाऊल ठेवल्यानंतर मराठ्यांना मोठं आवाहन केलं आहे.

आझाद मैदानातील उपोषण स्थळावरून बोलताना मनोज जरांगे आंदोलकांना उद्देशून म्हणाले, "तुमची जबाबदारी काय आहे ते समजून घ्या. सरकार आपणाला सहकार्य करणार नव्हतं म्हणून आपण मुंबईला जायचं आणि मुंबई जाम करायची ठरवलं होतं. पण आता एक गोष्ट लक्षात ठेवा सरकार सहकार्य करत आहे.

आपण ठरल्याप्रमाणे मुंबईत आलोय. मी दहा वाजल्यापासून उपोषण सुरू करणार आहे. मात्र, सर्व उपस्थितांना महत्त्वाचं आवाहन आहे की, सर्वांनी आपल्या ड्रायव्हरला फोन करून आताच्या आता आपापल्या गाड्या काढायला सांगा आणि पोलीस बांधव सांगतील तिकडे नेऊन लावा.

तुम्ही मुंबई जाम केली आहे ती पुन्हा दोन तासांमध्ये मोकळी झाली पाहिजे, त्यासाठी वाहनं पोलीस सांगतील तिकडे नेऊन लावा. मला एकही बातमी कानावर नाही आली पाहिजे आणि पोलीस नाराज नाही झाले पाहिजेत, असं म्हणत जरांगे यांनी वाहनांमुळे झालेल्या ट्रफिकपासून मुंबई मोकळी करण्याचं आवाहन मराठ्यांना केलं.

आपण आझाद मैदानावर येणार होतो आलो. अनेकांना वाटलं होतं पाय ठेवू देणार नाही पण मराठे मांडी घालून बसले. सरकारच्या हातात आहे परवानगी देणं आणि सरकार परवानगी देईल, न्यायदेवता आपल्याला परवानगी देईल. आपण सरकारला पुन्हा अर्ज करणार आहोत परवानगीसाठी.

इथे आपण आपल्या समाजाला न्याय देण्यासाठी आलो आहोत. आपल्या मागण्यांची अमंलबजावनी झाल्याशिवाय मी मागे हटणार नाही, असा इशारा देखील जरागेंनी पुन्हा एकदा राज्य सरकारला दिला आहे. तर माझ्या मराठ्यांची मान खाली जाईल असं वागू नका असं आवाहन देखील त्यांनी उपस्थित आंदोलकांना यावेळी केलं.