Mira-Bhayandar : मिरा-भाईंदर महापालिकेचा मोठा निर्णय, विकास आराखडा रद्द! समितीची स्थापना

प्रकाश लिमये

Mira Bhayandar News : मिरा भाईंदर मधील धोकादायक व अनधिकृत बांधकामांच्या पुनर्विकासाठी मंजूर असलेल्या क्लस्टरचे सर्व आरखडे रद्द करण्यात आले आहेत. शुक्रवारी (ता.20) झालेल्या महासभेत  हा निर्णय  घेण्यात आला आहे. त्यामुळे ही योजना पुन्हा एकदा लांबणीवर पडणार आहे. दुसरीकडे मिरा भाईंदरचा राज्य सरकारकडे मान्यतेसाठी प्रलंबित असलेला विकास आराखडा देखील रद्द करून त्यासाठी समिती गठित करण्याचा निर्णय महासभेने घेतला आहे.

मिरा भाईंदर शहरातील धोकादायक, मोडकळीस आलेल्या इमारती, अनधिकृत चाळी, झोपडपट्ट्यांच्या पुनर्विकासासाठी क्लस्टर योजना मंजूर झाली आहे. एकंदर 24 ठिकाणी योजना राबविण्याचे नक्की करण्यात आले व त्याचे आराखडे देखील महापालिकेने नागरिकांच्या माहितीसाठी प्रसिद्ध केले. त्यासाठी आवश्यक सर्वेक्षणासाठी राज्य सरकारने दहा कोटी रुपये महापालिकेला दिले आहेत. 

मात्र झोपडपट्टी भागात विरोधामुळे सर्वेक्षणच सुरू होऊ शकले नाही. तर शहरी भागात क्लस्टर मुळे  इमारतींच्या पुनर्विकासला तांत्रिक समस्यांचा अडथळा निर्माण झाला. त्यामुळे क्लस्टर योजना सुरूच होऊ शकली नाही.

शुक्रवारी झालेल्या महासभेत क्लस्टरचे सर्व 24 आरखडे रद्द करण्याचा निर्णय घेण्यात आला आहे. या आराखड्यात लोकांच्या सुविधेसाठी रस्ते, उद्याने, खेळाची मैदाने, शाळा आदींची आरक्षणेच दाखवण्यात आली नव्हती. शिवाय एकत्रिकृत विकास नियंत्रण नियमावलीत क्लस्टरची सुविधा देण्यात आली आहे. या पार्श्वभूमीवर चुकीचे असलेले क्लस्टरचे आराखडे रद्द करण्यात आले असल्याची माहिती उपमहापौर ध्रुवकिशोर पाटील यांनी दिली.

महापौरांच्या अध्यक्षतेखाली समिती

शहराच्या राज्य सरकारच्या मंजुरीच्या प्रतीक्षेत असलेल्या विकास आरखड्यातही अनेक लोकोपयोगी आरक्षणे ठेवण्यात आलेली नाहीत, शहरातील काही विकसकांनी प्रशासनाला हाताशी धरून स्वत:च्या फायद्यासाठी अनेक आरक्षणे रद्द केली. त्यामुळे हा विकास आराखडा रद्द करून आराखड्यातील चूका दुरुस्त करून आवश्यक आरक्षणांचा आराखड्यात समावेश व्हावा यासाठी महापौरांच्या अध्यक्षतेखाली समिती गठित करण्यात आली आहे. या समितीचा अहवाल राज्य सरकारकडे पाठविण्यात येईल, अशी माहिती उपमहापौरांनी दिली.