Zeeshan Siddique News : वडील राष्ट्रवादीत जाताच झिशान यांची हकालपट्टी; काँग्रेसकडून मोठा निर्णय

Mumbai News : माजी मंत्री बाबा सिद्दिकी यांनी काही दिवसांपूर्वीच काँग्रेसला रामराम ठोकत राष्ट्रवादी काँग्रेसमध्ये प्रवेश केला आहे. त्यानंतर काही दिवसांतच काँग्रेसने त्यांचे आमदार पुत्र झिशान यांनाही झटका दिला. झिशान यांची मुंबई युवक काँग्रेसच्या अध्यक्षपदावरून हकालपट्टी करण्यात आली आहे. (Zeeshan Siddique News)

झिशान (Zeeshan Siddique) हे मुंबईतील वांद्रे पूर्व मतदारसंघाचे आमदार आहेत. त्यांचे वडील बाबा सिद्दिकी (Baba Siddique) यांनी काही दिवसांपूर्वीच राष्ट्रवादीत प्रवेश केल्यानंतर झिशान यांच्याही राष्ट्रवादी प्रवेशाची चर्चा होती. मात्र, त्यांनी काँग्रेसमध्ये थांबणार असल्याचे त्यावेळी स्पष्ट केले. असे असले तरी काँग्रेसवर टीका केली होती.

झिशान हेही काँग्रेसमधून (Congress) बाहेर पडू शकतात, अशी जोरदार चर्चा अजूनही राजकीय वर्तुळात आहे. त्यामुळे पक्षाने त्यांच्याकडून युवक काँग्रेसचे अध्यक्षपद काढून घेतल्याची चर्चा आहे. झिशान यांच्या जागी अखिलेश यादव यांची नियुक्ती करण्यात आली आहे. तर सुफियान मोहसीन हैदर या कार्यकारी अध्यक्ष असतील.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)  

भारतीय युवक काँग्रेसचे अध्यक्ष श्रीनिवास बी. व्ही. यांनी मुंबईसह काही राज्यांतील अध्यक्षांची नव्याने नियुक्ती केली आहे. दरम्यान, झिशान यांनी वडिलांच्या राष्ट्रवादीत प्रवेशापूर्वी काँग्रेसवर सडकून टीका केली होती. कोरोनासह इतर अडचणींच्या काळात पक्षाने मदत केली नसल्याचा गंभीर आरोप त्यांनी केला होता. झिशान यांच्या आक्रमक भूमिकेमुळे राजकीय वर्तुळातून भुवया उंचावल्या गेल्या आहेत.

झिशान म्हणाले होते की, मी सध्या तरी काँग्रेसमध्ये आहे. भविष्यातील राजकीय स्थिती काय असेल, याबाबत आताच काही सांगता येत नाही. मात्र, सरकार असतानाही महाविकास आघाडीत माझ्यावर झालेला अन्याय जगजाहीर आहे. तरुण आमदार असल्याने मदतीची अपेक्षा होती. मात्र, कुणीही अडचणीत मदत केली नाही. मला खटकणाऱ्या गोष्टींबाबत वारंवार जाहीरपणे बोललो, मात्र त्याचीही कुणी दखल घेतली नाही, असा आरोप झिशान यांनी केला होता.

R