MNS cash bomb: मनसेकडून ‘कॅश बॉम्ब’ची मालिका सुरुच! संदीप देशपांडेंकडून PWD अधिकाऱ्याचा लाच घेतानाचा VIDEO शेअर

MNS Sandeep Deshpande Video: यंदाचे हिवाळी अधिवेशन ‘कॅश बॉम्ब’ मालिकमुळे गाजत आहे. शिवसेना उद्वव बाळासाहेब ठाकरे पक्षाचे नेते, माजी विरोधीपक्ष नेते अंबादास दानवे यांनी अधिवेशनाच्या दुसऱ्या दिवशी ‘कॅश बॉम्ब’ फोडला. यात शिवसेनेचे आमदार महेंद्र दळवी यांचा पैशासोबतचा व्हिडिओ दानवे यांनी व्हायरल करुन खळबळ उडवून दिली होती. दानवे यांच्यानंतर मनसेचे नेते संदीप देशपांडे यांनी देखील कॅश बॉम्ब टाकत धुरळा उडवून दिला होता .

देशपांडेंनी आज पुन्हा एकदा असाच एक ‘कॅश बॉम्ब’ टाकला आहे. मुंबईतील सार्वजनिक बांधकाम विभागातील (पीडब्ल्यूडी) भ्रष्टाचार प्रकरण त्यांनी उघडकीस आणले आहे. देशपांडे यांनी आपल्या फेसबुक पोस्टवरुन हा व्हिडीओ शेअर केला आहे. पीडब्लुडी विभागाचा अधिकारी लाच घेताना व्हिडिओमध्ये दिसत आहे. व्हिडिओमध्येही लाच घेण्यासंदर्भातील संवाद आणि दृश्ये दिसत असल्याचा आरोप संदीप देशपांडे यांनी केला आहे.

'सार्वजनिक बांधकाम विभाग फक्त "खाते " भाग दुसरा...' असे कॅप्शन संदीप देशपांडे यांनी या व्हिडीओला दिले आहे. काल (मंगळवारी) पत्रकार परिषद घेत संदीप देशपांडे यांनी पीडब्लुडीच्या हाफकीन शाखेत शाखा अभियंता सरकारकडून येणाऱ्या निधीतील टक्केवारी घेतानाचा व्हिडीओ शेअर केला होता.

'२ लाख ८० हजार रुपये फक्त शासनाचा निधी आणण्याकरता घेतले जात आहेत. निधी मिळण्यापूर्वीच कंत्राटदारांकडून पैसे घेतले जातात. आधी कंत्राटदारांकडून काही ठराविक टक्केवारी घेतली जायची. पण आता निधी आणण्याचे, वर्क ऑर्डर काढण्याचे आणि अंतिम बिलाची वेगवेगळी टक्केवारी घेतली जाते. यासोबत भ्रष्टाचाराच्या टक्केवारीत कंत्राटदारांची बोली देखील लागते, असा आरोप देशपांडे यांनी मंगळवारी केला आहे . आज ते पुन्हा पत्रकार परिषद घेणार आहे. यावेळी ते काय गौप्यस्फोट करतात, हे लवकरच समजेल .