Mumbai High Court: मुंबई हायकोर्टाचा मोठा निर्णय! अपघातग्रस्ताच्या कुटुंबियांना १.३ कोटींची नुकसान भरपाई; हेल्मेट नसल्याचा दावा फेटाळला

Mumbai High Court: मुंबई हायकोर्टानं नुकताच एक मोठा निर्णय दिला आहे. या निर्णयाची बरीच चर्चा सुरु असून यामध्ये अपघातग्रस्त व्यक्तीला तब्बल १.३ कोटी रुपयांची नुकसान भरपाई मिळणार आहे. विशेष म्हणजे अपघातावेळी संबंधित पीडित व्यक्तीनं डोक्यात हल्मेट घातलं नव्हतं, हा युक्तीवादही हायकोर्टानं फेटाळून लावला आहे.

याप्रकरणात यापूर्वी मोटार अपघात दावा न्यायाधिकरण अर्थात मॅटनं अपघातात पीडित व्यक्तीचा मृत्यू झाल्यानं त्याच्या कुटुंबाला १.३ कोटी रुपयांची नुकसान भरपाई देण्याचे आदेश दिले होते. या आदेशाविरोधात हायकोर्टात अपील करण्यात आलं होतं. पण हायकोर्टानं हे अपील फेटाळून लावत मॅटचा आदेश कायम ठेवला. यामुळं पीडित कुटुंबाला मोठा दिलासा मिळाला आहे.

हायकोर्टात काय घडलं?

रस्ता अपघाताचा शिकार बनलेल्या एका कुटुंबाला १.३ कोटी रुपायांची नुकसान भरपाई देण्याचा कनिष्ठ कोर्टाचा आदेश हायकोर्टानं कायम ठेवला. यामध्ये मृत्यू पावलेल्या व्यक्तीनं हेल्मेट घातलं नव्हतं हा दावा विरोधी पक्षाकडून करण्यात आला होता, पण तो हायकोर्टानं फेटाळून लावला. अपघातग्रस्त व्यक्तीचा मृत्यू झाल्यानंतर त्याच्या कुटुंबियांकडून हायकोर्टात धाव घेतली होती. हायकोर्टानं म्हटलं की, हेल्मेट न घालणं हा नुकसान भरपाई कमी करण्याचा आधार बनू शकत नाही. कारण मुख्य चूक दुसऱ्या वाहन चालकाची होती. त्यामुळं हा मोठा अपघात घडला.

प्रकरण नेमकं काय?

हे प्रकरण २०१८ मधील असून ठाणे जिल्ह्यात हा रस्ता अपघात झाला होता. यामध्ये एका दुचाकीस्वाराचा मृत्यू झाला होता. आपला निकाल देताना हायकोर्टानं विमा कंपनी आणि अपघाताला कारणीभूत ठरुन दुचाकी चालकाच्या मृत्यूलाही कारणीभूत ठरलेल्या दुसऱ्या वाहनचालकाच्या मालकाला संयुक्त स्वरुपात आणि वेगवेगळ्या स्वरुपात भरपाई देण्याचा आदेश दिला होता. ही भरपाईची एकूण रक्कम तब्बल १.३ कोटी रुपये होते.