परमबीर सिंग रडारवर; अखेर पोलिसांनी ठोठावला न्यायालयाचा दरवाजा

मुंबई : मुंबईचे माजी पोलिस आयुक्त परमबीर सिंग (Parambir Singh) यांच्यावर आतापर्यंत ४ गुन्हे (FIR) नोंदवण्यात आले आहेत. यातील ३ गुन्हे वसूलीचे तर १ गुन्हा अँट्रोसिटीचा आहे. या प्रकरणांमध्ये परमबीर सिंग अद्याप पोलिसांच्या हाती लागलेले नाहीत. त्यांच्याविरोधात लुकआऊट नोटीसही (LookOut Notice) काढण्यात आली आहे. ते परदेशात पळून गेल्याची शक्यताही व्यक्त केली जात आहे. त्यामुळे अखेर मुंबई पोलिसांनी (Mumbai Police) बुधवारी न्यायालयाचा दरवाजा ठोठावला आहे.

मुंबई पोलिसांच्या गुन्हे शाखेने (Crime Branch) सत्र न्यायालयामध्ये परमबीर सिंग यांच्याविरोधात अर्ज दाखल केला आहे. त्यामध्ये त्यांच्याविरोधात अजामीनपात्र अटक वॉरंट काढण्याची विनंती करण्यात आली आहे. या अर्जावर शुक्रवारी (ता. 29) सुनावणी होणार असल्याची माहिती गुन्हे शाखेकडून देण्यात आली. मुंबई पोलिसांनी 9 ऑक्टोबर रोजी परमबीर सिंग यांना चौकशीसाठी हजर व्हावे, याबाबत समन्स पाठवले होते. पण ते हजर झाले नाहीत. पोलीस त्यांच्या मलबार हील येथील घरीही गेले होते.

दरम्यान, परमबीर सिंग यांच्या विरोधात राज्य सरकारने कारवाईचा फास आवळण्यास सुरवात केली आहे. त्यांच्या वेतनाबाबत पोलीस महासंचालक संजय पांडे यांनी गृहविभागाला काही सूचना दिल्या आहेत. परमबीर सिंग यांच्यासह २५ वरिष्ठ पोलिस अधिकाऱ्यांच्या निलंबनाचा प्रस्ताव पाठविण्यात आला आहे. मुंबईच्या आयुक्तपदावरुन गृहरक्षक दलामध्ये उचलबांगडी केल्यानंतर परमबीर सिंग यांनी २० मार्चला लेटर बॉम्ब टाकून माजी गृहमंत्री अनिल देशमुख ( Anil Deshmukh) आणि राज्य सरकारला अडचणीत आणलं.

परमबीर सिंग हे गृहरक्षक दलाचे महासंचालक आहेत. मात्र, अनेक महिने ते गैरहजर राहिल्याने कोषागार कार्यालयाने विचारणा केली होती. , एप्रिलच्या अखेरच्या आठवड्यात परमबीर सिंह आठ दिवसांची रजा घेऊन चंदीगडला त्यांच्या निवासस्थानी गेले. त्यानंतर तिथूनच ते सिक लिव्ह दर १५ दिवसांनी वाढवत राहिले.त्याचं वेतन रोखलं आहे. गृहविभागाने परमबीर सिंह यांच्याविरोधात राज्य सरकारने कारवाई करण्यास सुरवात केली असून त्याचा पहिला भाग म्हणून परमबीर सिंह यांचे वेतन रोखण्यात आलं आहे. परमबीर सिंह यांना फरार घोषित करण्याची तयारी राज्य सरकारनं केली असल्याचे समजते. त्यामुळे परमबीर सिंह यांच्या अडचणी वाढल्या आहेत. गृहविभाग आता या सर्व प्रकाराचा तपास करीत आहेत. परमबीर सिंह यांची विभागीय चौकशी सुरु आहे. पुढील सूचना मिळेपर्यंत त्यांचं वेतन रोखण्याबाबतचे पत्र गृहविभागाने महासंचालाकांना पाठविल्याचे सुत्रांनी सांगितले.

राज्याचे पोलिस महासंचालक संजय पांडे यांनी २५ वरिष्ठ पोलिस अधिकाऱ्यांचा निलंबनाचा प्रस्ताव गृहविभागाला पाठविल्यानंतर चैाकशी सुरु झाली आहे. या चैाकशीत परमबीर सिंह हे गेल्या पाच महिन्यापासून गायब असल्याची माहिती गृहविभागाला मिळाली आहे. यानंतर गृहविभागाने होमगार्ड विभागाला परमबीर सिंह यांचे वेतन रोखण्याच्या सूचना दिल्या आहेत. माजी गृहमंत्री अनिल देशमुख यांनी आपल्याला शंभर कोटी वसुलीचे टार्गेट दिले होते, असा आरोप परमबीर सिंह यांनी केला आहे.

ते मे महिन्यात रजेवर गेले. तेव्हापासून परमबीर सिंह हे गृहविभागाच्या संपर्कात नाही. शंभर कोटी वसुलीचा तपास करणाऱ्यासाठी स्थापन करण्यात आलेल्या चांदीवाल आयोगासमोर साक्ष देण्यासाठी परमबीर सिंह उपस्थित राहिले नाहीत. परमबीर सिंह यांनी एका व्यक्तीच्या माध्यमातून चांदीवार आयोगाकडे शपथपत्र सादर केले आहे. ''शंभर कोटीच्या वसुलीच्या बाबतीत मला काहिही माहित नाही, मला याबाबत कुठलीही साक्ष द्यायची नाही,'' असे परमबीर सिंह यांनी या शपथपत्रात म्हटलं आहे. हे पत्र चंडीगड येथून पाठविल्याचे तपासात स्पष्ट झाले आहेत.