Navi Mumbai Election : नवी मुंबईत महापौर पदावर भाजप, शिंदेंच्या शिवसेनेची दावेदारी; मंदा म्हात्रेंचा मुलगाही मैदानात!

Navi Mumbai Politics : नवी मुंबईत गणेश नाईकांनी स्वबळाचा नारा दिला आहे तर, एकनाथ शिंदेंची शिवसेना देखील स्वबळावर लढण्यास तयार आहे. त्यामुळे भाजप आणि शिवसेना दोघांनी आपला महापौर होणार असा दावा केला आहे. पक्ष कुठलाही असला तरी सत्ता राखण्यास गणेश नाईक नेहमीच यशस्वी ठरले आहेत.

नाईक ज्या पक्षाचे नेतृत्व करतात त्या पक्षाचा महापौर होत असतो. मागील पंचवार्षिक निवडणुकीत एससीसाठी महापौरपद राखीव झाल्याने सुधाकर सोनवणे यांची वर्णी लागली होती. त्यांनतर मागास प्रवर्गाचे आरक्षण लागल्याने जयवंत सुतार महापौर झाले. त्याआधी पाच वर्ष गणेश नाईकांचे पुतणे सागर नाईक महापौर होते. आता महापौरपदासाठी इच्छुकांची संख्या वाढली आहे.

नाईक घराण्यातूनच पुढचा महापौर असल्याची चर्चा आहे. त्यामध्ये संजवी नाईक यांचे पुत्र संकल्प नाईक आणि पुतणे यांचे नाव आघाडीवर आहे. तर, महापौर महिलांसाठी राखीव झाल्यास नाईक समर्थक सुषमा दंडे, मनीषा भोईर यांची नाव आघाडीवर येतील.

शिवसेनेकडून चौगुले दावेदार

शिवसेनेत फूट पडली तेव्हा विजय चौगुले हे एकनाथ शिंदेंसोबत राहिले. महापालिकेत शिवसेनेची सत्ता आल्यास महापौरपदाचे ते प्रमुख दावेदार असतील. एकनाथ शिंदे देखील चौगुलेंच्या पारड्यात मत टाकण्याची शक्यता आहे.

मंदा म्हात्रे लागल्या तयारीला

मंदा म्हात्रे यांनी कुणाच्या घरातील महापौर करायचा नाही यावेळी महिला महापौर होईल, असे वक्तव्य करत अप्रत्यक्षपणे नाईकांना विरोध दर्शवला आहे. यंदा त्यांची सून आणि मुलगा निवडणूक लढण्याच्या तयारीत असल्याची चर्चा आहे. त्यांचा मुलगा निलेश म्हात्रे निवडणुकीच्या मैदानात असेलच असे सांगितले जात आहे.