Navi Mumbai Municipal Corporation : माजी नगरसेवकांचा कहर, स्वतःसह पत्नी, मुलगा, सून, छोट्या मुलासाठी तिकिटांची मागणी! एकनाथ शिंदेंना होतय ब्लॅकमेलिंग?

Navi Mumbai Municipal Election : महापालिका निवडणुकांसाठी उमेदवार अर्ज भरण्यासाठी लगबग सुरू असतानाच, मुंबई, नवी मुंबईसह राज्यातील महापालिकांमधील निवडणुकांनी लक्ष वेधून घेतलं आहे. सर्वच पक्षांमध्ये इच्छुकांची संख्या वाढल्याने, पक्ष श्रेष्ठींची डोकेदुखी वाढली आहे. भाजपकडे सर्वाधिक इच्छुक असले, तरी त्या खालोखाल एकनाथ शिंदे यांच्या शिवसेनेकडे उमेदवारी मागणाऱ्यांची सर्वाधिक रीघ आहे.

यातच नवी मुंबई महापालिका निवडणुकीत इच्छुक असलेल्या शिवसेनेच्या माजी नगरसेवकांनी उमेदवारीच्या मागणीसंदर्भात कहर केला आहे. काही माजी नगरसेवकांनी स्वतःसह पत्नी, मुलगा, सून आणि छोट्या मुलांसाठी तिकिटांची मागणी केल्याचा प्रकार समोर आला आहे. यासाठी एकनाथ शिंदेंना ब्लॅकमेलिंग देखील केलं जात असल्याची चर्चा आहे.

नवी मुंबई (Navi Mumbai) महापालिकेत भाजपचे मंत्री गणेश नाईक यांच्याविरोधात एकनाथ शिंदे शिवसेनेचा संघर्ष आहे. गणेश नाईक यांच्यावर शिंदे शिवसेनेकडून नेहमी घराणेशाहीचा आरोप होता. परंतु महापालिकेच्या निवडणुकीनिमित्ताने उलटा फेर धरला आहे. एकनाथ शिंदे यांच्या शिवसेनेच्या माजी नगरसेवकांनी घरातच एकापेक्षा अधिक उमेदवारी मागितल्याचा प्रकार समोर आला आहे.

शिवसेनेच्या इच्छुक माजी नगसेवकांनी स्वतःसह पत्नी, मुलगा, सून, छोटा मुलगा अशा सर्वांना उमेदवारी मागितली आहे. माजी नगरसेवकांची ही इच्छा म्हणजे, राजकीय कहर आहे. यामुळे एकनाथ शिंदे (Eknath Shinde) यांच्या शिवसेनेत घराणेशाही उफाळून आली आहे का? अशी चर्चा आहे.

एकनाथ शिंदे शिवसेनेचे जिल्हाध्यक्ष द्वारनाथ भोज यांनी, 2015 मध्ये निवडणूक झाली होती. त्यावेळी निवडणुकीत एका घरातील दोन-तिघे निवडून आले होते. त्या उमेदवारांनी पाच वर्षाचा कालावधी पूर्ण केला होता. यावेळी इच्छुकांची संख्या खूप मोठी आहे. विशेष करून, शिवसेनेकडून इच्छुक सर्वाधिक आहे. शिवसेनेच्या माजी नगरसेवकांची अशी एकापेक्षा जास्त उमेदवारांची मागणी असली, तरी एकनाथ शिंदेसाहेब अन् खासदार नरेश म्हस्के लक्ष ठेवून आहेत.

शिंदेंना ब्लॅकमेल केल जात आहे का?

गेल्या काही दिवसांत अनेक दिग्गजांचा पक्षप्रवेश शिवसेनेत करून घेण्यात आला आहे. यातून या माजी नगरसेवकांच्या अपेक्षा वाढल्या आहेत. हेच माजी नगरसेवक वारंवार एकनाथ शिंदे यांच्याकडे जाऊन, एका पेक्षा अधिक तिकीटांची उमेदवारी मागत आहे. एकनाथ शिंदेंवर दबाव आणत आहेत, आता पर्याय निघत नसेल, तर आम्ही आमचा पर्याय काठतो, असे म्हणून ब्लॅकमेल करत आहे, असे चित्र आहे.

एकनाथ शिंदेच निर्णय घेतील

द्वारनाथ भोज यांनी यावर प्रतिक्रिया देताना, शिवसेनेसाठी योग्य काय, याचा निर्णय एकनाथ शिंदे घेतील. मागणी करणं, हा उमेदवारांचा अधिकार आहे. परंतु वस्तुस्थितीला धरून निर्णय शिंदेसाहेबच घेतली, असे सांगितले.

एकापेक्षा अधिक उमेदवारी मागणारे उमेदवार?

यात नवी मुंबई महापालिकेत शिवराम पाटील, प्रशांत पाटील, सोमनाथ वास्कर, एम. के. मढवी हे उमेदवार प्रत्येकी चार उमेदवारी मागत असल्याची चर्चा आहे. तसंच अविनाश लाड यांनी दोन उमेदवारी मागितल्याचे सांगितले जाते. परंतु याबाबत शिवसेनेकडून कोणतीही अधिकृत पुष्टी देत नाहीत.