Operation Lotus : कसं... नाना म्हणतील तसं...,भाजपला रोखणाऱ्या ठाकूरांचा गेम राजीव पाटील फिरवणार?

Vasai Virar Mahapalika : महापालिका निवडणुकीत बहुजन विकास आघाडीच्या हातात तिसऱ्यांदा सत्ता आली आहे. मात्र, 1 नगरसेवकावरून तब्बल 44 जागा मिळवणाऱ्या भाजपच्या कामगिरीची चर्चा देखील जोरात आहेत. त्यातच 'ऑपरेशन लोटस'द्वार हितेंद्र ठाकूरांना धक्का भाजपचे प्रयत्न केले जात असल्याची चर्चा सोशल मीडियावर आहे.

या चर्चेनंतर लगेचच नालासोपाऱ्यात 'कसं, नाना म्हणतील तसं', असा आशय असलेला बॅनर झळकला आहे. त्यातच राजकारणात काहीही होऊ शकते, असे सूचक विधान भाजपच्या मनोज बारोट यांनी केल्याने राजकीय वातावरण तापायला सुरुवात झाली आहे.

वसई–विरार महापालिकेच्या अतिशय चुरशीच्या निवडणुकीत बहुजन विकास आघाडीने मित्र पक्षांच्या मदतीने ७१ जागा जिंकत स्पष्ट बहुमत मिळवले आहे. तर भाजपने ४३ आणि शिंदे गटाने १ जागा जिंकली आहे. बविआला सत्ता स्थापनेचे स्पष्ट कौल मिळाला आहे. तर महायुतीला सत्ता स्थापनेसाठी अजून १६ नगरसेवकींची गरज आहे.

यापार्श्वभूमीवर गेल्या दोन दिवसांपासून वसईत ऑपरेशन लोटसच्या माध्यमातून बविआचे नगरसेवक फोडण्याचे प्रयत्न सुरु असल्याची चर्चा सुरु झाली आहे. या र्चेवर बविआचे नेते हितेंद्र ठाकूर यांनी टीका केली आहे. असले धंदे करू नका. नाहीतर लोक शेण घालतील. जनतेने आधीच तुम्हाला धडा शिकवला आहे. माझा एकही नगरसेवक फुटणार नाही,” असा ठाम विश्वास ठाकूर यांनी व्यक्त केला आहे.

यालाच अनुसरून भाजपने ऑपरेशन नाही.जनतेचा विश्वास असे पोस्टर लावून बविआला डिचवण्याचा प्रयत्न केला आहे. या चर्चेमुळे वसई–विरारचं राजकारण सध्या चांगलेच तापले असताना आणखी एका पोस्टरने ही चर्चा अधिकच रंगतदार बनली आहे.

सध्या बविआपासून अंतर ठेऊन असलेले माजी महापौर राजीव पाटील यांच्या भूमिकेबद्दलही वसईकरांमध्ये उत्सुकता आहे. यापार्श्वभूमीवर नालासोपाऱ्यातील सेंट्रल पार्क परिसरात, कसं, नाना म्हणतील तसं, अशा आशयाच्या लागलेल्या एका बॅनरने ऑपरेशन लोट्सची चर्चा अधिकच रंगू लागली आहे. हे पोस्टर कुणी लावले, याबद्दल अधिक माहिती कुणाकडेही नसल्याने संभ्रम मात्र निर्माण झाला आहे.