परमवीर सिंहांच्या अडचणीत वाढ : खंडणीच्या गुन्ह्यात PSI गोपाळे, कोकरे यांना अटक

मुंबई : खंडणीच्या गुन्ह्याप्रकरणी मुंबईचे माजी पोलिस आयुक्त परमवीर सिंह यांच्यासह उपायुक्त अकबर पठाण, श्रीकांत शिंदे, पोलिस निरीक्षक आशा कोकरे, पोलिस निरीक्षक नंदकुमार गोपाळे, संजय पाटील, सुनील जैन, आणि संजय पुनमिया यांच्याविरोधात गुन्हा दाखल करण्यात आला होता. त्यातील नंदकुमार गोपाळे व आशा कोकरे यांना गुन्हे अन्वेषण विभागाने (सीआयडी) अटक केली आहे. (PSI Nandkumar Gopale, Asha Kokare arrested for ransom)

श्यामसुंदर अग्रवाल यांनी मरीन ड्राईव्ह पोलिस ठाण्यात दाखल केलेल्या गुन्ह्यात गोपाळे आणि कोकरे यांना अटक करण्यात आली आहे. दरम्यान, दाखल गुन्हा मागे घेण्यासाठी बांधकाम व्यवसायिकाकडून खंडणी मागितल्याचा आरोप मुंबईचे माजी पोलिस आयुक्त परमबीर सिंह यांच्यासह उपायुक्त अकबर पठाण, श्रीकांत शिंदे, पोलिस निरीक्षक आशा कोकरे, पोलिस निरक्षक नंदकुमार गोपाळे, संजय पाटील, सुनील जैन, आणि संजय पुनमिया यांच्याविरोधात गुन्हा दाखल करण्यात आला आहे.

श्यामसुंदर अग्रवाल यांच्या तक्रारीवरून मुंबईतील मरिन ड्राइव्ह पोलीस स्टेशनमध्ये परमबीर सिंग यांच्याविरोधात खंडणी वसुलीचा गुन्हा दाखल करण्यात आला होता. त्यानंतर श्यामसुंदर अग्रवाल यांचे पुतणे शरद अग्रवाल यांच्या तक्रारीवरून ठाण्याच्या कोपरी पोलिस ठाण्यात वसुलीचा गुन्हा दाखल करण्यात आलेला आहे.

यापूर्वी मरीन ड्राईव्ह पोलिस ठाण्यात नोंदवलेल्या प्रकरणाच्या तपासासाठी एसआयटीची स्थापना करण्यात आली होती. एसआयटीकडून त्या प्रकरणाचा तपास करण्यात आला होता, त्यानंतर तेच प्रकरण सीआयडीकडे हस्तांतरित करण्यात आले होते. सीआयडीने तपासाअंती मुंबई पोलिस दलातील अधिकारी नंदकुमार गोपाळे व आशा कोकरे यांना आज अटक केली आहे.