Mumbai News : महाराष्ट्र विधानसभा अध्यक्ष राहुल नार्वेकर यांनी काल (दि. 10 जाने.) बुधवारी ऐतिहासिक शिवसेना आमदार अपात्रता प्रकरणावर निकाल दिला. निवडणूक आयोगाने यापूर्वीच शिवसेना पक्ष हा मुख्यमंत्री एकनाथ शिंदे यांचाच आहे, असा निकाल दिला होता. आता विधिमंडळ शिवसेनाही शिंदेंचीच असल्याचे शिक्कामोर्तब झाले. अध्यक्षांच्या या निर्णयाला ठाकरे गट सर्वोच्च न्यायालयात आव्हान देणार आहे. मात्र आता शिवसेनेचा निकाल दिल्यानंतर राष्ट्रवादी काँग्रेस पक्षाच्या (NCP) दोन्ही गटांनी दाखल केलेल्या याचिकांवर अध्यक्षांना निकाल द्यायचा आहे. सर्वोच्च न्यायालयाच्या आदेशानुसार नार्वेकर यांना ३१ जानेवारीपर्यंत या याचिकांवर निर्णय घ्यावा लागणार आहे. (Latest Marathi News)
विधिमंडळ सचिवालयाच्या नोंदीवरून व ही कार्यवाही 6 जानेवारीपासून सुरू झाली होती. 18 जानेवारीला किंवा त्यापूर्वी, सर्व संबंधित पक्ष साक्षीदारांची यादी आणि शपथपत्रांची पडताळणी करण्यात येईल. 20 जानेवारीला साक्षीदारांची उलटतपासणी, तर 23 जानेवारीला प्रतिवादींची उलटतपासणी होणार आहे. अंतिम सुनावणी 25 जानेवारीला सुरू होईल आणि 27 जानेवारीला संपेल. त्यानंतर अध्यक्ष नार्वेकर आपला निर्णय देतील.
राष्ट्रवादी काँग्रेस (अजित पवार गट) सुनील तटकरे म्हणाले, राष्ट्रवादी काँग्रेसचे प्रकरण शिवसेनेपेक्षा वेगळे आहे. या प्रकरणात तो व्हीपची वैधता आणि प्रतिस्पर्धी गटांनी जारी केलेला व्हीप कायदेशीररित्या वैध होता की नाही याविषयी संबंधित आहे. आम्ही एनडीएच्या बैठकीत उपस्थित राहिल्यानंतर आमच्यावर शिस्तभंगाची कारवाई सुरू करण्यात आली," असा मुद्दा तटकेंनी उपस्थित केला.
अजित पवार गटाने याआधीच निवडणूक आयोगाकडे याचिका दाखल केली आहे. अजित पवार यांना राष्ट्रवादीचे राष्ट्रीय अध्यक्ष म्हणून मान्यता द्यावी आणि त्यांच्या गटाला घड्याळाचे निवडणूक चिन्ह बहाल करण्यात यावे, असे याचिकेत म्हटले आहे. निवडणूक आयोगाने सर्व पक्षांचे म्हणणे ऐकून घेत आपला निर्णय राखून ठेवला आहे. राष्ट्रवादी काँग्रेस शरद पवार गटाचे नेते जितेंद्र आव्हाड म्हणाले, 'अजित पवार यांनी संविधानाच्या 10 व्या अनुसूचीचे उल्लंघन केले आहे. अजित पवार आणि त्यांच्या आठ सहकाऱ्यांनी 2 जुलै 2023 रोजी मुख्यमंत्री एकनाथ शिंदे सरकारमध्ये मंत्री म्हणून शपथ घेतली. आम्ही 10 व्या अनुसूचीचे उल्लंघन केल्याबद्दल त्यांच्याविरुद्ध अपात्रतेची कारवाईची मागणी केली आहे."
दरम्यान, विधानसभेचे अध्यक्ष राहुल नार्वेकर यांनी महाराष्ट्राचे मुख्यमंत्री एकनाथ शिंदे यांना मोठा दिलासा देताना बुधवारी सांगितले की, मुख्यमंत्री एकनाथ शिंदे यांचीच खरी शिवसेना, असा निकाल दिला. एकनाथ शिंदे यांच्यासह शिवसेनेच्या 16 आमदारांना अपात्र ठरवण्याची उद्धव ठाकरे गटाची याचिकाही नार्वेकरांनी फेटाळून लावली. नार्वेकर यांनी निकाल देताच मुख्यमंत्री शिंदे यांच्या समर्थकांनी फटाके फोडून जल्लोष सुरू केला. तर शिवसेना (UBT) नेते उद्धव ठाकरे आणि संजय राऊत यांनी विधानसभा अध्यक्षांच्या आदेशाविरोधात सर्वोच्च न्यायालयात जाणार असल्याचे सांगितले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.