Sharad Pawar vs BJP : "भाजपचं हिंदुत्व म्हणजे खरातचं..."; शरद पवारांना निधर्मी म्हणणाऱ्या फडणवीसांवर ठाकरेंच्या खासदाराची बोचरी टीका

Mumbai News, 13 Apr : जेष्ठ नेते तथा राज्यसभा खासदार शरद पवार यांनी एका लेखात, वारकरी संप्रदायासारख्या समतेच्या चळवळीत प्रतिगामी लोक घुसखोरी करू लागले आहेत. वारकरी संप्रदायात 60 टक्के लोकांची मांडणी धर्मांध शक्तींना बळ देणारी असून दुर्दैवाने या प्रबोधनाच्या मार्गावर कुठे महिला नाहीत", अशी खंत व्यक्त केली आहे.

त्यांच्या या लेखावरून राज्यातील राजकारण चांगलंच तापलं आहे. भाजपच्या नेत्यांनी शरद पवारांवर सडकून टीका करायला सुरूवात केली आहे. तर खुद्द राज्याचे मुख्यमंत्री देवेंद्र फडणवीस यांनी देखील शरद पवार हे निधर्मी असल्याची बोचरी टीका केली आहे.

पवारांच्या वक्तव्यावर प्रतिक्रिया देताना फडणवीस म्हणाले, "पवारसाहेबांचं महाराष्ट्राच्या विकासात योगदान असलं तरीही त्यांचा वारकरी संप्रदायाशी फार संबंध राहिलेला नाही. त्यांनी स्वतःही अनेक वेळा कबूल केले आहे की ते निधर्मी आहेत धर्म मानत नाहीत. त्यांचा सगळा पिंड निधर्मी आहे. त्यांचा जो काही लेख आहे तो अत्यंत चुकीचा आहे. आणि मला दु:ख आहे की त्यांनी अशा प्रकारचा लेख लिहिला.", असं फडणवीस यांनी म्हटलं आहे.

दरम्यान, फडणवीसांच्या याच वक्तव्यावर आता ठाकरेंच्या शिवसेनेचे खासदार संजय राऊत यांनी भाजप आणि फडणवीस यांच्यावर हल्लाबोल केला आहे. या देशात आणि जगाच फक्त देवेंद्र फडणवीस आणि भाजपच्या लोकांचाच हिंदुत्वाशी संबंध आहे बाकी सगळे लोक बाहेरच्या देशात जन्माला आले आहेत.

फक्त भाजपचे लोकच हिंदुस्थानात हिंदु म्हणून जन्माला आले असं त्यांना म्हणायचं आहे. पण ते जे हिंदुत्व मानतायत ते हिंदुत्व नाही. त्यांचं हिंदुत्व खरातचं हिंदुत्व आहे. भाजपचं हिंदुत्व खरातचं असून तो जो अजून बुवा पकडला आहे एरंडे हे त्यांचं हिंदुत्व आहे जे आम्ही कधीच स्विकारणार नाही, अशा शब्दात राऊतांनी फडणवीसांवर निशाणा साधला आहे.