IAS Officer : महाराष्ट्रातील बड्या IAS अधिकाऱ्याचं तडकाफडकी निलंबन : अधिवेशनकाळातच झालेल्या कारवाईने प्रशासनात खळबळ

मुंबई : राज्य विधीमंडळाचं अर्थसंकल्पीय अधिवेशन सुरु असतानाच एक मोठी घडामोड समोर आली आहे. यामध्ये राज्यातील एका बड्या IAS अधिकाऱ्यावर थेट निलंबनाची कारवाई करण्यात आली आहे. याप्रकारामुळं एकच खळबळ उडाली असून याची सर्वत्र चर्चा सुरु आहे.

नेमकं प्रकरण काय?

चंद्रपूरमधील आमदारांनं सभागृहात पशुसंवर्धन व पर्यावरण मंत्री पंकजा मुंडे यांना पर्यावरणासंदर्भात एक प्रश्न विचारला होता. या प्रश्नाला त्यांना उत्तर देता आलं नाही कारण याची आपल्याकडं माहिती नसल्याचं त्यांनी म्हटलं होतं. पण हे सांगताना मुंडेंनी म्हटलं की, अधिकाऱ्यांना याबाबत माहिती देण्यास मी सांगितलं होतं पण त्यांनी हे काम अद्याप केलेलं नाही, त्यांना वारंवार बोलवून देखील ते यासंदर्भात माहिती देण्यास उपस्थित राहिलेले नाहीत.

पंकजा मुंडेंच्या या उत्तरानंतर तालिका अध्यक्ष दिलीप लांडे यांनी या प्रकरणाची गंभीर दखल घेत संबंधित अधिकारी प्रदुषण नियंत्रण मंडळातील सदस्य, सचिव असलेले IAS अधिकारी एम देवेंद्र सिंग यांच्या निलंबनाचे आदेश दिले. या आदेशानंतर पर्यावरण विभागानं IAS सिंग यांना निलंबीत करण्याची प्रक्रिया सुरु करुन याची फाईल मुख्यमंत्र्याकडं पाठवून दिली. त्याचबरोबर सहसंचालक IAS सतीश पडवळ यांना देखील निलंबीत करण्याची प्रक्रिया सुरू करण्यात आली आहे. यांपैकी एम. देवेंद्र सिंग यांच्या निलंबनाच्या फाईलवर मुख्यमंत्र्यांनी सही केल्यानं आता त्यांच्यावर निलंबनाची कारवाई करण्यात आली आहे.

का दिले निलंबनाचे आदेश?

दरम्यान, आपल्या या आदेशावर स्पष्टीकरण देताना तालिका अध्यक्ष दिलीप लांडे यांनी सांगितलं की, "संबंधित खात्याचे अधिकारी माहिती देत नसतील, मंत्र्यांना सहकार्य करत नसतील तर हा सभागृहातील सर्व आमदारांचा, महाराष्ट्रातील जनतेचा अपमान आहे. अधिकारी हा किती मोठा असला तरी त्याला त्याची जबाबादरी दाखवून देणं हे आमचं काम आहे"