Sharad Pawar Birthday : सुप्रिया सुळेंनी शेअर केली 'बाबा'ची गोष्ट..

Sharad Pawar Birthday: राष्ट्रवादी काँग्रेसचे अध्यक्ष शरद पवार यांचा आज (दि.12) 82 वा वाढदिवस आहे. या वाढदिवसानिमित्त पंतप्रधान नरेंद्र मोदींसह सर्वच राजकीय पक्षाच्या नेतेमंडळींसह सर्वच स्तरांतून पवार यांच्यावर शुभेच्छांचा वर्षाव करण्यात येत आहे. राष्ट्रवादी काँग्रेसच्या खासदार आणि लेक सुप्रिया सुळे (Supriya Sule) यांनी देखील शरद पवार यांच्या वाढदिवसानिमित्त सोशल मीडियावर खास पोस्ट लिहित आपल्या भावनांना वाट मोकळी करुन दिली आहे.

खासदार सुप्रिया सुळे यांनी टि्वटर, फेसबुक आणि इन्स्टाग्रामच्या अकाऊंटवरुन वडिलांसोबतचा फोटो पोस्ट करत शरद पवारांना शुभेच्छा दिल्या आहेत. सुळे लिहितात, प्रिय बाबा, तुम्ही आम्हां सर्वांसाठी उर्जेचा अखंड स्रोत आहात. समाजकारण, राजकारण या क्षेत्रांसह कौटुंबिक पातळीवर देखील तुम्ही आम्हा सर्वांचे आदर्श आहात.

तुमच्या विचारांची स्वाभिमानी मशाल घेऊन आम्ही सर्वजण आपल्यासोबत अविश्रांत चालण्याचा प्रयत्न करत आहोत. बाबा, तुम्हांला निरोगी दिर्घायुष्य लाभो ही सदिच्छा. वाढदिवसाच्या हार्दिक शुभेच्छा या शब्दांत सुळे यांनी आपल्या सोशल मीडियावरील पोस्टमध्ये भावना व्यक्त केल्या आहेत.

पंतप्रधानांच्या शुभेच्छा...

पंतप्रधान नरेंद्र मोदी यांनी देखील शरद पवार यांना वाढदिवसाच्या शुभेच्छा दिल्या आहेत. त्यांनी पोस्टमध्ये शरद पवार साहेबांना वाढदिवसाच्या हार्दिक शुभेच्छा. त्यांच्या दीर्घायुष्यासाठी मी प्रार्थना करतो असं म्हटलं आहे.

राष्ट्रवादी काँग्रेसचे नेते व विरोधी पक्षनेते अजित पवार यांनी देखील शरद पवारांना वाढदिवसाच्या शुभेच्छा दिल्या आहेत.लोककल्याणाचा ध्यास, लोकविकासाची दूरदृष्टी असणारे व्यक्तिमत्त्व, सर्वपक्षीय कार्यकर्त्यांचे आदरस्थान, महाराष्ट्राचे अखंड ऊर्जास्रोत आदरणीय साहेब यांना वाढदिवसाच्या मनापासून शुभेच्छा! आपणांस उत्तम निरोगी आरोग्य व दीर्घायुष्य लाभो ही प्रार्थना! अशा आशयाचं टि्वट केलं आहे.