Sanjay Raut News: पत्राचाळ प्रकरणी तुरुंगातून बाहेर काढण्यामागं पवार की ठाकरे ? संजय राऊत म्हणाले...

Mumbai : ठाकरे गटाचे नेते व खासदार संजय राऊत हे शिंदे गट, भाजपवर सातत्यानं हल्लाबोल करत असतात. तसेच ते केंद्रातील मोदी सरकारसह शिंदे फडणवीस सरकारवर टीका करण्याची एकही संधी सोडत नाही. याच राऊतांना काही महिन्यांपूर्वी पत्राचाळ घोटाळा प्रकरणी 'ईडी'ने अटक केली होती.

एकीकडे राऊतांची लवकर तुरुंगातून सुटका होणार नाही असा अंदाज व्यक्त करण्यात येत होता. मात्र, १०४ दिवसांच्या तुरुंगवासानंतर त्यांना जामीन मंजूर करण्यात आला होता. त्यांना तुरुंगातून बाहेर काढण्यात कुणाचा हात होता. याचा खुलासा आता स्वत: संजय राऊतां(Sanjay Raut)नी केला आहे.

एका खासगी वृत्तवाहिनीला दिलेल्या मुलाखतीत संजय राऊतांनी पत्राचाळ प्रकरणावर भाष्य करतानाच ईडीच्या कारवाईतून तुरुंगातून बाहेर काढण्याच्या कायदेशीर लढाईवर मोठं विधान केलं आहे. तुरुंगातून बाहेर काढण्याचं सर्व श्रेय आपला भाऊ आणि ठाकरे गटाचा आमदार सुनील राऊत(Sunil Raut) यांना दिलं आहे.

शिवसेनेतील बंडखोरीनंतर उध्दव ठाकरेंच्या पाठीशी खंबीरपणे उभे राहिलेल्या व्यक्तींमध्ये खासदार संजय राऊत हे नाव सर्वात पुढे घ्यावे लागेल. जसे ते ठाकरेंच्या जवळचे आहेत तसेच ते शरद पवारांच्याही जवळचे मानले जातात. ठाकरे गटाची बाजू भक्कमपणे मांडत असतात. शिंदे गटासह भाजपवर टीका करण्यात ते नेहमीच आघाडीवर असतात.

कथित पत्राचाळ प्रकरणी त्यांना ईडी कारवाईला सामोरे जावे लागले होते. पवार आणि ठाकरेंशी चांगले संबंध असल्यानेच राऊतांची इतर तुरुंगातून लवकर सुटका झाल्याची जोरदार चर्चा रंगली होती. मात्र, याबाबतीत स्वत:राऊतांनी मोठा गौप्यस्फोट केला आहे.

...असा मी एकमेव माणूस!

राऊत म्हणाले, मी साडे तीन महिने तुरुंगात राहिलो. सुनील राऊत मला १०० टक्के तुरुंगातून बाहेर काढणार, याची मला खात्री होती. तो बाहेर काय करतोय, याची माहिती मी घेत होतो. त्याची मेहनत मी पाहत होतो. आतापर्यंत देशभरात ईडीकडून केलेल्या कारवायांमध्ये फक्त तीन महिन्यांत तुरुंगातून बाहेर आलेला एकमेव माणूस मी आहे. मी निष्कलंकपणे बाहेर आलोय, कोर्टाने माझी अटक बेकायदेशीर असल्याचंही नमूद केलं होतं.

जेव्हा मी तुरुंगातून बाहेर आलो, तेव्हा मी उद्धव ठाकरें(Uddhav Thackeray)ना भेटलो. तेव्हा उद्धव ठाकरे म्हणाले, संजय तू सुनीलमुळे बाहेर आलाय. त्यानंतर मी शरद पवारांकडे गेलो, तेव्हा शरद पवारही म्हणाले, तू बाहेर आलास ही सुनील राऊतची मेहनत आहे. हे खरं आहे की, ज्या पद्धतीने सुनील बाहेर कायदेशीर लढाई लढत होता, ती मलाही कधी जमली नसती.

राऊतांचा मोठा गौप्यस्फोट...

ज्या दिवशी 'ईडी'ने मला अटक केली, त्याच्या आदल्या दिवशी एका नेत्याचा मला फोन आला होता. आपण केंद्रीय गृहमंत्री अमित शहा यांच्याशी बोलू, असं त्यांनी मला सांगितलं. पण मी त्याला नकार दिला. पण मी काहीही झालं तरी ईडीच्या समोर झुकायचे नाही असं आमच्या घरी ठरलं होतं.शिवसेनेच्या प्रतिमेला धक्का लागेल असे कोणतंही कृत्य करायचं नाही

(Edited By Deepak Kulkarni)