मुख्यमंत्री आज खासदारांना देणार कानमंत्र ; शिवसेना सामान्य जनतेपर्यत पोहचणार

मुंबई : शिवसेनेच्या संघटनात्मक बांधणीसाठी तसेच राज्यात गेल्या अडीच वर्षात शिवसेनेनं केलेल्या आणि करत असलेल्या विकासात्मक कामांची माहिती सर्वसामान्य जनतेपर्यत पोहचवण्यासाठी, शिवसेनेनं "शिव संपर्क अभियान" सुरू केलं आहे.

शिवसेनेच्या या शिव संपर्क (Shiv Sampark Abhiyan)अभियानात सहभागी असणाऱ्या खासदारांना आणि पदाधिकाऱ्यांना शुभेच्छा देण्यासाठी शिवसेना पक्ष प्रमुख आणि मुख्यमंत्री उद्धव ठाकरे (Uddhav Thackeray) आज (रविवारी) दुपारी १२ वाजता व्हिडियो कॅान्फरसिंगद्वारे संवाद साधणार आहेत.

यावेळी शिवसेना नेते आणि खासदार संजय राऊत, विनायक राऊत तसेच मुंबईतील इतर खासदार शिवसेना भवनात उपस्थित राहणार आहेत. शिव संपर्क अभियानाचा पहिला टप्पा २२ ते २५ मार्च दरम्यान पूर्व विदर्भ, पश्चिम विदर्भ आणि मराठवाड्यातील एकुण १९ जिल्ह्यात सुरू होणार आहे. या १९ जिल्ह्यात शिवसेनेचे १९ खासदार शिव संपर्क अभियान सुरू करणार आहेत.

पहिल्या टप्यातील १९ जिल्ह्यात प्रत्येक जिल्ह्यात शिवसेनेचा एक खासदार आणि त्यांच्या सोबत शिवसेना पदाधिकाऱ्यांची १२ जणांची टीम कार्यरत असणार आहे. शिव संपर्क अभियानाच्या मार्फत शिवसेना सर्व सामान्य नागरिकांपर्यंत राज्यात शिवसेना करत असलेल्या विकास कामांची माहिती पोहचवणार आहे.