Maratha Reservation : मराठा आरक्षणाबाबत संजय राऊतांचं सरकारला आवाहन, म्हणाले...

Mumbai News: दिल्लीतील शेतकरी आंदोलन, महाराष्ट्रातील मराठा आरक्षणाचा प्रश्न, ईव्हीएम विरोधात आंदोलन, अशा विविध विषयांवर भाष्य करत शिवसेना ठाकरे गटाचे खासदार संजय राऊत यांनी केंद्र आणि राज्य सरकारवर जोरदार निशाणा साधला. मराठा आरक्षणाचा प्रश्न एकमताने सोडवावा आणि विशेष अधिवेशन निर्णायक ठरावं, तसेच ओबीसींच्या आरक्षणाला धक्का लावू नये, असं आवाहन राऊत यांनी केलं. (Maratha Reservation in Assembly special session 2024)

'देशात जे सरकार विरोधात लढतात, त्यांना तपास यंत्रणाचा वापर करून त्रास दिला जात आहे. आमच्यासारख्या प्रखर बोलणाऱ्यांना या माध्यमातून रोखण्याचा प्रयत्न केला जात आहे. काळ्या पैशाचा वापर करून खासदार, आमदार खरेदी केले जात आहेत', असा गंभीर आरोप राऊतांनी केला. तसेच पंतप्रधान नरेंद्र मोदींना विरोधी पक्ष हुकूमशहा म्हणू लागले असल्याची टीकाही त्यांनी केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

शेतीमालाला हमीभाव मिळावा, तसेच स्वामिनाथन समितीच्या शिफारशींची अंमलबजावणी करावी, यासाठी शेतकरी संघटनांनी आंदोलन पुकारले आहे. या आंदोलनाला उद्धव ठाकरे भेट देण्याची शक्यता आहे. शेतकऱ्यांच्या आंदोलनाबाबत माहिती घेतली असून, ही माहिती उद्धव ठाकरे यांना सांगितली जाईल, यानंतर निर्णय होईल. पण दिल्लीत उभं केलेलं शेतकऱ्यांचं आंदोलन हे देशातील सर्व शेतकऱ्यांसाठी महत्त्वाचं आहे. शेतकऱ्यांच्या या आंदोलनाबाबत उद्धव ठाकरे हे अतिशय संवेदनशील आहेत, असं राऊत म्हणाले.

पंतप्रधान मोदींवर निशाणा

पंतप्रधान नरेंद्र मोदी यांच्यावर निशाणा साधत खासदार संजय राऊत यांनी मोदींची तुलना पुतिन यांच्याशी केली. तसेच पंतप्रधान नरेंद्र मोदी हे विरोधकांच्या बाबतीत पुतिन यांच्यापेक्षा वेगळं काय करतात? असा सवाल करत हल्लाबोल केला. तसेच देशात सुरू असलेल्या 'ईडी', 'सीबीआय'च्या कारवाईवरून विरोधी पक्षांच्या नेत्यांवर कारवाई करण्यात येत असल्याचा आरोप केला.

(Edited By-Ganesh Thombare)

R