Shiv Sena Symbol Case : शिवसेना पक्षचिन्ह प्रकरणाच्या सर्वोच्च सुनावणीआधीच असीम सरोदेंचा एकनाथ शिंदेंवर गंभीर आरोप, उपस्थित केला 'हा' मोठा प्रश्न

Mumbai News, 08 Oct : संपूर्ण महाराष्ट्राचं लक्ष लागून राहिलेल्या माजी मुख्यमंत्री उद्धव ठाकरे आणि उपमुख्यमंत्री एकनाथ शिंदे यांच्यातील शिवसेना पक्ष आणि धनुष्यबाण या निवडणूक चिन्ह प्रकरणाची अंतिम सुनावणी आज सुप्रीम कोर्टात पार पडणार आहे.

या सुनावणीत नेमका कोणाचा विजय होणार याची उत्सुकता दोन्ही शिवसेनेतील नेते आणि कार्यकर्त्यांमध्ये आहे. स्थानिक स्वराज्य संस्था निवडणुकीचा मार्ग मोकळा झाल्यानंतर ठाकरेंच्या शिवसेनेने दोन वर्षापासून प्रलंबित असेलेल्या शिवसेना पक्ष आणि चिन्हाबाबतच्या याचिकेवर तातडीने सुनावणी घेण्याची मागणी केली होती.

त्यानुसार आज (ता.8) या बाबातची सुनावणी सुप्रीम कोर्टात होणार आहे. मात्र, ही सुनावणी होण्यापूर्वीच आता सर्वोच्च न्यायालयात ठाकरेंच्या शिवसेनेची बाजू मांडणारे वकील असीम सरोदे यांनी एक्सवर पोस्ट करत मोठा प्रश्न उपस्थित केला आहे.

असीम सरोदे यांनी आपल्या पोस्टमध्ये लिहिलं की, 'शिवसेना पक्षचिन्ह प्रकरण जस्टीस सूर्यकांत यांच्या बेंचसमोर आज 16 नंबरला लागलेले असल्याने ते प्रकरण सुनावणीसाठी रिच होणार हे नक्की. परंतु एका इतर एका अर्धवट सुनावणी झालेल्या प्रकरणातील बेंचचे सुद्धा जस्टीस सूर्यकांत सदस्य न्यायाधीश आहेत.

त्यामुळे शिवसेना पक्षचिन्ह प्रकरणाची सुनावणी आज पूर्ण होईल का? असे प्रश्नचिन्ह आहे. त्याचवेळी एकनाथ शिंदे यांच्यातर्फे असे प्रयत्न होतीलच की सुनावणी पुढे ढकलली जावी.' असं ट्विट करत सरोदे यांनी आजची सुनावणी पुढे ढकलली जावी यासाठी उपमुख्यमंत्री एकनाथ शिंदेंकडून प्रयत्न केले जातील असा संशय व्यक्त केला आहे.

त्यामुळे आजची सुनावणी अंतिम ठरणार की पुन्हा एकदा पुढची तारीख पक्षचिन्ह प्रकरणी दिली जाणार हे पाहणं महत्वाचं ठरणार आहे. दरम्यान, आधीच अनेकदा तारखांमागून तारखा मिळाल्यामुळे पक्षातील फूट पडल्याच्या घटनेला तीनवर्षांहून अधिक काळ लोटला तरीही शिवसेना नाव आणि चिन्ह नेमकं कुणाचं याबाबतची निकाल लागलेला नाही. मात्र, आता स्थानिकच्या निवडणुकांच्या तोंडावर तरी या प्रकरणी अंतिम निकाल लागणार का? असा प्रश्न ठाकरेंच्या शिवसेनेकडून उपस्थित केला जात आहे.