अंधेरी पोटनिवडणुकीत ट्विस्ट : अर्ज माघारीसाठी दबाव टाकला; अपक्ष उमेदवाराच्या तक्रारीची आयोगाकडून दखल

मुंबई : अंधेरी (Andheri) पूर्व विधानसभा मतदारसंघाची पोटनिवडणूक (By Election) पुन्हा एकदा चर्चेत आली आहे. कारण, या मतदारसंघातून पोटनिवडणूक लढवणारे मिलिंद कांबळे (Milind Kamble) यांनी अर्ज माघारी घेण्यासाठी आपल्यावर उद्धव ठाकरे (Uddhav Thackeray) गटाकडून दबाव टाकण्यात आला, अशी तक्रार केंद्रीय निवडणूक आयोगाकडे (Election Commission) करत ही पोटनिवडणूक रद्द करण्यात यावी, अशी मागणी केली आहे. त्यामुळे निवडणूक आयोगाने कांबळे यांच्या पत्राची दखल घेतली असून ते काय निर्णय घेणार, याकडे राज्याचे लक्ष लागले आहे. (Thackeray group pressured me to withdraw application : Milind Kamble)

अंधेरी पूर्व विधानसभेच्या पोटनिवडणुकीतून माघार घ्यावी, यासाठी शिवसेना (उद्धव बाळासाहेब ठाकरे) या पक्षाच्या कार्यकर्त्यांकडून माझ्यावर दबाव टाकण्यात आला. तसे धमकीही देण्यात आल्याचा आरोप मिलिंद कांबळे यांनी केला होता. याशिवाय अन्य अपक्ष उमेदवारांवर देखील दबाव टाकून त्यांना देखील निवडणूक प्रक्रियेतून माघार घेण्यास भाग पाडले, त्यामुळे अंधेरी पूर्व विधानसभा पोट निवडणूक प्रक्रिया रद्द करण्यात यावी, अशी तक्रार मिलिंद कांबळे यांनी केंद्रीय निवडणूक आयोगाकडे केली आहे.

केंद्रीय निवडणूक आयोगाने अंधेरी पोटनिवडणुकीतील अपक्ष उमेदवार मिलिंद कांबळे यांच्या तक्रारीची दखल घेतली आहे. आता आयोग यासंदर्भात काय भूमिका घेतो, हे पाहावे लागणार आहे. दरम्यान, याप्रकरणी कांबळे यांनी वर्षा येऊन मुख्यमंत्री एकनाथ शिंदे यांची भेट घेतली आहे. त्यामुळे आगामी काळात शिंदे गटाचीही पोटनिवडणुकीसंदर्भात काय भूमिका असणार, याची उत्सुकता आहे.

दरम्यान, अंधेरी पूर्व पोटनिवडणुकीत शिवसेना उद्धव बाळासाहेब ठाकरे गटाकडून ऋतुजा लटके आणि भाजपकडून मुरजी पटेल यांनी अर्ज भरले होते. मात्र, भापजने या निवडणुकीतून माघार घेतली आहे, त्यामुळे या निवडणुकीतील चुरस संपली होती. मात्र, अपक्ष उमेदवार मिलिंद कांबळे यांच्या तक्रारीमुळे या पोटनिवडणुकीत पुन्हा ट्विस्ट आला आहे. आता लक्ष केंद्रीय निवडणूक आयोगाकडे असणार आहे.