Uddhav Thackeray Group Active: बंड केलेल्या आमदारांच्या मतदारसंघात ठाकरे गटाची मोर्चेबांधणी ; युवासेनेचे सदस्य..

Mumbai News : आगामी विधानसभा निवडणुकांच्या पार्श्वभूमीवर ठाकरे गटाची युवासेना कामाला लागली आहे. युवासेना कोअर कमिटीचे सदस्य राज्यातील 40 विधानसभा मतदार संघाचा दौरा करणार आहे. ज्या मतदार संघातून आमदारांनी बंड केले त्या मतदार संघात जाऊन युवासेनेचे सदस्य आढावा घेणार आहेत.

युवासेनेतील सदस्यांकडे जिल्ह्याची जबाबदारी देण्यात आली आहे. या महिनाअखेर मतदारसंघाचा आढावा दौरा पूर्ण करुन आढावा देण्याच्या सूचना या सदस्यांना देण्यात आल्या आहेत.

एकनाथ शिंदे यांनी बंड केल्यानंतर अनेक जिल्ह्यातून युवासेनेतील पदाधिकारी देखील ठाकरेंना सोडून गेले आहेत, या पार्श्वभूमीवर युवासेनेच्या कोअर कमिटीतील सदस्य या मतदार संघाचा देखील आढावा घेणार आहेत. युवासेनेतील कोअर कमिटी सदस्यांचा दौरा संपल्यानंतर आदित्य ठाकरे देखील दौरा करणार आहेत.

दरम्यान माजी मुख्यमंत्री उद्धव ठाकरे यांनी पीएम केअर फंडावरुन भाजपवर निशाणा साधला आहे. "पीएम केअर फंड सरकारी नाही असे म्हणतात, त्यांची चौकशी होऊ शकत नाही, नेमका हा फंड आहे कुणाचा? पीएम म्हणजे प्रभाकर मोरे फंड आहे का हा? मग सांग वसाड्या पैसा गेला तरी कुठे?, असा खोचक टोला उद्धव ठाकरे यांनी लगावला आहे.

युवासेनेतील कोअर कमिटी सदस्यांना दिलेले जिल्हे आणि मतदार संघ

• सिद्देश धाऊसकर - संभाजीनगर जिल्हा आणि जिल्ह्यातील मतदार

• रुपेश कदम - अमरावती, अकोला

• अंकित प्रभू - धुळे, नाशिक

• धनश्री कोलगे - भिवंडी, कल्याण, उल्हासनगर, अंबरनाथ

• राजूल पाटील - मुंबई

• शीतल शेठ - नवी मुंबई, ठाणे, पालघर

• साईनाथ दुर्गे - नांदेड, धाराशिव

• पवन जाधव - कोल्हापूर, पाटण

• सुप्रद्धा फातर्फेकर - कोकण, रत्नागिरी

• विक्रांत जाधव - रायगड

• प्रवीण पाटकर - सिंधुदुर्ग

• हर्षल काकडे - नागपूर, भंडारा, चंद्रपूर

• निलेश महाले - जळगाव