MNS On Shivsena: उध्दव ठाकरेंनी युतीचे संकेत देऊन 24 तास होत नाही, तोच मनसे नेता भडकला; प्रश्नांचा मारा अन् करुन दिली 'ती' आठवण

Mumbai News : गेल्या काही दिवसांपासून महाराष्ट्राच्या राजकारणात उद्धव ठाकरेंची शिवसेना आणि राज ठाकरेंच्या मनसे युतीचं वारं वाहू लागलं आहे. अशातच शिवसेनेच्या (उद्धव बाळासाहेब ठाकरे) पक्षाच्या वर्धापनदिनाच्या मेळाव्यातही पक्षप्रमुख उद्धव ठाकरे (Uddhav Thackeray) यांनी मनसेसोबत जे राज ठाकरे आणि राज्याच्या मनात आहे, तेच होईल असं सूचक वक्तव्य केलं होतं. हे विधान करुन 24 तास उलटण्याआधीच मनसे नेत्यानं उद्धव ठाकरेंनाच धारेवर धरलं आहे.

मुंबई महापालिकेच्या निवडणुकीसाठी मनसेसोबत युतीसाठी आग्रही असलेल्या महाराष्ट्र नवनिर्माण सेनेचे मुंबई शहराध्यक्ष संदीप देशपांडे यांनी शुक्रवारी (ता.20) उद्धव ठाकरेंवर प्रश्नांची सरबत्ती केली आहे. मनसेची स्थापना होऊन 19 वर्षे झाली,पण या आधी आमच्याशी कधीही युतीचं सूचलं नाही. मग आताच का उत्साह वाढलाय? असा तिखट सवालही त्यांनी केला आहे.

संदीप देशपांडे यांनी उद्धव ठाकरेंच्या शिवसेना पक्षाची अवस्था सध्या बिकट असल्यानेच त्यांना युतीचं सुचलं असल्याचा आरोपही केला.जर विधानसभा निवडणुकीत त्यांच्या शिवसेनेच्या 20 ऐवजी 60 जागा आल्या असत्या तर आमच्याशी युती करण्याचा विचार तरी केला असता का?अशा शब्दांत त्यांनी उद्धव ठाकरेंवर निशाणा साधला आहे.

उद्धव ठाकरे त्यांच्या कार्यकर्त्यांना आणि पदाधिकाऱ्यांना मनसेसोबत जायचं का असं विचारत आहेत. यावर भाष्य करताना संदीप देशपांडे (Sandeep Deshpande) म्हणाले, याआधी कधी विचारलं का शरद पवारांसोबत जाऊ का? काँग्रेससोबत जाऊ का?आमदारांच्या तेव्हा बैठका घेतल्या होत्या का?असा जिव्हारी लागणारे सवालही देशपांडे यांनी विचारले.

मनसे नेते संदीप देशपांडे म्हणाले,आमच्यासोबतच्या युतीसाठी दोन वर्षांपूर्वी उत्साह का दाखवला नाही. याआधी आम्ही दोनवेळा युतीचा प्रस्ताव पाठवला होता, त्यावेळी शिवसैनिकांनी इतका उत्साह का दाखवला नाही. तुमच्या पक्षावर वाईट वेळ आली आहे,मान्य आहे. पक्ष वाचविण्यासाठी हे सर्व करत आहात. पण युतीसाठी आमच्यावर दबाव टाकू नसल्याचा इशाराही देशपांडे यांनी टाकला.

मनसे आणि शिवसेनेने एकत्र यावेत असे बॅनर यापूर्वीही लावण्यात आले होते. त्यावेळी युतीसाठी तुम्ही पुढे का आला नाहीत? पण आता जर आमच्यावर दबाव टाकण्याचा प्रयत्न केला तर सहन करणार नाही, असा इशाराही देशपांडे यांनी दिला आहे.

उद्धव ठाकरेंनी शिवसेना वर्धापनदिनाच्या कार्यक्रमात मनसेसोबतच्या युतीवर सकारात्मक असल्याचे संकेत दिले होते.यानंतर आता शरद पवारांनी मुंबईत आमच्या सर्वांपेक्षा उद्धव ठाकरेंचे शक्तीस्थान जास्त आहे. मुंबईतील जागावाटपात शिवसेनेची भूमिका महत्त्वाची असणार असल्याचे संकेत त्यांनी दिले

तसेच सध्या महाविकास आघाडी म्हणून मुंबईबाबत काही चर्चा झालेली नाही. पण मुंबईत आमच्या सर्वांपेक्षा उद्धव ठाकरेंचे शक्तीस्थान जास्त आहे. त्यामुळे त्यांना विचारात घ्यावं लागले, असेही शरद पवारांनी म्हटले. त्यामुळे त्यांना विचारात घ्यावे लागेल,असेही पवारांनी सांगितले.