Walmik Karad : वाल्मीक कराडचा आणखी एक कारनामा उघड; फिल्म प्रोडूसरचे कार्ड सापडलं, खंडणीचा पैसा चित्रपटसृष्टीत गुंतवला?

Mumbai, 31 March : मस्साजोगचे सरपंच संतोष देशमुख यांच्या खूनप्रकरणामुळे संपूर्ण महाराष्ट्र हळहळला. मात्र या प्रकरणातील कृष्णा आंधळे अजूनही फरारी आहे. वाल्मिक कराड आणि त्याच्या सहकाऱ्यावर देशमुख यांच्या खुनाचा गुन्हा दाखल करण्यात आलेला आहे. अटकेनंतर कराड याचे अनेक काळे धंदे उघडकीस आले. त्याचा आणखी एक कारनामा पुढे आला असून वाल्मीक कराड हा फिल्म प्रोडूसर असल्याचे आज उघडकीस आले आहे, त्यामुळे त्याने चित्रपट निर्मितीत पैसे गुंतवले का?, असा सवाल यानिमित्ताने उपस्थित होत आहे.

माजी मंत्री धनंजय मुंडे यांचे बीडमधील सर्व कार्यक्रमाचे नियोजन हा वाल्मीक कराड (Walmik Karad) करायचा. मुंडे यांचा दौरा, पक्षाच्या प्रमुख नेतेमंडळींच्या दौऱ्यांचा इव्हेंट वाटावा, एवढं भपकेबाज नियोजन हा वाल्मीक कराड करायचा. सिनेअभिनेत्रींपासून कीर्तनकरांपर्यंत अनेक मोठे कार्यक्रम परळीत झाले, त्याचे नियोजन कराड करायचा. आता वाल्मीक कराडचा आणखी एक ‘उद्योग’ पुढे आला आहे.

वाल्मीक कराड हा फिल्म प्रोडूसर (film producer) होता, असे समोर आले आहे. वाल्मीक कराड याचे आयडी कार्ड सोशल मीडियावर व्हायरल झाले आहे. कराड याच्या नावाचे इंडियन मोशन पिक्चर प्रोडूसर असोसिएशनचे आयडी कार्ड आहे. बी. आर. जे. फिल्म प्रोडक्शनचा वाल्मीक कराड हा आजीवन सभासद असल्याचे पुढे आले आहे. त्याचा सभासद नंबर 23480 असल्याचे त्यात दिसून येत आहे.

वाल्मीक कराड याच्या बीकेसीमधील याच फिल्म प्रॉडक्शनच्या ऑफिसचे फोटो देखील समोर आले आहेत, त्यामुळे वाल्मीक कराड हा चित्रपट निर्माता होता का, असा सवाल उपस्थित होत आहे. संतोष देशमुख यांच्या खून प्रकरणामुळे चर्चेत आलेला वाल्मिक कराड हा खून, खंडणी आणि इतर गुन्ह्यांमध्ये आरोपी आहे.

बीडमध्ये औष्णीक वीज प्रकल्पाच्या राखेतून कोट्यवधी रुपये कमावले आहेत. याशिवाय इतर अवैध धंद्यातून कराड याने कोट्यवधीची माया कमवाली आहे, तो ब्लॅक मनी वाल्मी कराड याने कमावला आहे, तो ब्लॅक मनी कराड याने चित्रपट क्षेत्रात गुंतवला का, असा सवाल वाल्मीक कराड ह्याच्या नावाने सापडलेल्या आयडी कोर्डमुळे उपस्थित होत आहे.