Vasai-Virar Politics : बविआला भाजपचा पुन्हा धक्का, माजी नगरसेवकांनी घेतले कमळ हाती!

BJP Politics : आगामी महापालिका निवडणुकीच्या पार्श्वभूमीवर मागील दोन-तीन महिन्यांपासून बहुजन विकास आघाडीला (बविआ) गळती लागली आहे. महापालिकेवर मोर्चा काढून बविआने शक्तिप्रदर्शन केले होते. मात्र, तरी देखील बविआमधून आऊट गोईंग थांबायचे नाव घेत नाही.

वसईच्या भाजप आमदार स्नेहा दुबे पंडित यांच्या नेतृत्वाखाली बविआतील माजी नगरसेवकांनी नुकताच भाजपमध्ये प्रवेश केला. वसई-विरार महापालिकेत हितेंद्र ठाकूर यांचे वर्चस्व होते. मात्र, विधानसभा आणि लोकसभेतील बविआच्या पराभवानंतर अनेक जण भाजपमध्ये प्रवेश करत आहेत.

भाजपमध्ये प्रवेश करणाऱ्यांमध्ये बविआघाडीचे माजी नगरसेवक प्रदीपभाई नरसिंग पवार, बविआचे नगरप्रमुख नंद किशोर नरसिंग पवार, बविआ संघटक ॲड. नैशाद सुभोधचंद्र पारिख, राजेंद्र चाफेकर,अमोल पाटील, कैलास रांगणेकर,सुधीर चौधरी, संतोष मिश्रा, प्रकाश विठ्ठल जाधव, महेश पाटील यांचा समावेश आहे. तसेच धर्म जागरण नगर संयोजक रविंद्र बाबूराव चव्हाण, सिध्देश राणे यांच्यासह विविध मंडळाचे अध्यक्ष आणि पदाधिकाऱ्यांनी भाजपमध्ये प्रवेश केला.

बविआ विरुद्ध भाजप सामना

आगामी वसई-विरार महापालिका निवडणुकीत बविआ विरुद्ध भाजप असा सामना होणार आहे. भाजपने बविआला गळती लावली असून बविआकडून डॅमेज कंट्रोल करण्यात येत आहे.विधानसभा आणि लोकसभेतील पराभवामुळे आगामी महापालिका निवडणुकी ही हितेंद्र ठाकूर यांच्या अस्तित्वाची लढाई असणार आहे.