VBA-Congress: आघाडी की आणखी काही? प्रकाश आंबेडकर अन् हर्षवर्धन सपकाळ यांच्यात नेमकी काय चर्चा झाली? जाणून घ्या इनसाईड स्टोरी

VBA-Congress: समविचारी पक्ष आघाडी न करता वेगवेगळे लढल्यानं मतविभाजन होऊन त्याचा फटका सर्वांना बसतो हे गेल्या काही निवडणुकांमधून काँग्रेसच्याबाबतीत स्पष्ट झालं आहे. महाराष्ट्रात लोकसभा आणि विधानसभा निवडणुकांमध्ये याचा मोठा फटका काँग्रेस पक्षाला म्हणजे एकूणच महाविकास आघाडीला बसला होता. याच एक प्रमुख कारण म्हणजे वंचितची नसलेली साथ. लोकसभेवेळी जागा वाटपावरुन वंचित इंडिया आघाडीत सामिल झाला नाही. तर विधानसभेलाही वंचितची साथ नसल्यानं मविआला काही प्रमाणात का होईना फटका बसला.

पण आता महापालिका निवडणुकीसाठी वंचित आणि काँग्रेसच्या युतीची चर्चा सुरु झाली आहे. त्याच कारण म्हणजे काल मंगळवारी काँग्रेसचे प्रदेशाध्यक्ष हर्षवर्धन सपकाळ यांनी वंचित बहुजन आघाडीचे प्रमुख प्रकाश आंबेडकर यांची मुंबईत येऊन भेट घेतली होती. या भेटीमध्ये येत्या निवडणुकांमध्ये आघाडीबाबत चर्चा झाल्याचं वृत्त जवळपास सर्वच माध्यमांनी सुत्रांच्या हवाल्यानं दाखवलं. पण आता दोघांमधील भेटीत नेमकी काय चर्चा झाली याची माहिती खुद्द प्रकाश आंबेडकर यांनी दिली आहे.

प्रकाश आंबेडकर आज कोल्हापुरच्या दौऱ्यावर होते. यावेळी पत्रकारांशी संवाद साधताना त्यांनी राज्यातील सध्या चर्चेत असलेल्या विविध मुद्द्यांवर भाष्य केलं. आंबेडकर म्हणाले, सकपाळ यांच्या भेटीचा राजकीय अर्थ काढू नका, त्यांच्या मुलीच्या इंग्लंडमधील शिक्षणाविषयी आमच्या बैठकीत चर्चा झाली. म्हणजेच भेटीमागील कारणं जरी प्रकाश आंबेडकर यांनी स्पष्ट केलं असलं तरी आगामी मुंबई-पुण्यासह राज्यातील २९ महापालिकांच्या निवडणुकांचा बिगुल वाजला आहे. त्यानंतर या दोन दिग्गज राजकीय नेत्यांची भेट झाली. त्यामुळं आंबेडकरांनी कारण काहीही सांगितलेलं असोत पण माध्यमांमध्ये वंचित आणि काँग्रेस आघाडीची चर्चा सुरु आहे.

पण तरीही आंबडेकरांनी सकपकाळांसोबतच्या बैठकीचा तपशील हा जाहीर केल्यानंतर या दोन्ही पक्षांची युती होणार की नाही, हे अद्याप गुलदस्त्यातच आहे. पण जर ही चर्चा लांबली तर अपक्ष उमेदवारांसोबत काँग्रेसला पुढे जावं लागेल. त्यामुळं तुर्तास तरी वंचित आणि काँग्रेसची आघाडी होईल याबाबत अद्याप संभ्रम आहे.