Voter App : मतदान केंद्रावर नाव शोधण्यात वेळ वाया घालवू नका! निवडणुका आयोगानं आणलंय 'हे' खास अॅप

Voter App for Mahapalika Elections 2025 : राज्यातील महापालिका निवडणुकांची आता घोषणा झाली आहे. त्यामुळं उमेदवारांची प्रचाराची लगबग सुरु होणार असून घरोघऱी उमेदवार भेटीगाठी घेण्यासाठी येतील. त्याचबरोबर मतदानाच्या दिवशी आपलं मतदान कुठल्या केंद्रावर असेल? आपल नाव मतदार यादीत आहे की नाही? हे तपासून घेणं मतदार म्हणून गरजेचं आहे. या सगळ्या गोष्टी आयत्यावेळी मतदान केंद्रावर जाऊन शोधण्यात तुमचा बराच वेळ वायाला जाऊ शकतो. त्यामुळं तुम्हाला आता घरच्या घरी मतदार यादीतील नाव आणि मतदान केंद्र तपासून पाहता येणार आहे. यासाठी निवडणूक आयोगानं एक अॅप आणलं आहे.

अॅपमध्ये काय तपासता येईल?

राज्य निवडणूक आयागोचं पोर्टल आहे या पोर्लटलवर मतदारांसाठी विविध सुविधा उपलब्ध करुन देण्यात आलेल्या आहेत. यामध्ये मतदारांचं संपूर्ण नाव किंवा EPIC क्रमांक टाकून सर्चची सुविधा उपलब्ध करुन देण्यात आलेली आहे. याशिवाय राज्य निवडणूक आयोगानं मताधिकार नावाचं एक अॅप विकसित केलेलं आहे. यामध्ये देखील मतदारांना त्यांचं नाव, प्रभाग, मतदान केंद्र ही माहिती मतदारांना उपलब्ध होणार आहे. सध्या हे मोबाईल अॅप अँड्रॉईडवर उपलब्ध आहे. तसंच अॅपलच्या मोबाईलमध्ये देखील हे आता उपलब्ध करुन दिलं जाणार आहे.

कधीपासूनची यादी ग्राह्य धरणार

या महापालिका निवडणुकांसाठी १ जुलै २०२५ पर्यंतची मतदार यादी वापरली जाणार आहे. म्हणजेच १ जुलैपर्यंत ज्या मतदारांची नावं यादीमध्ये आधीच आहेत किंवा ज्या मतदारांनी नव्यानं पण १ जुलैपूर्वी नाव नोंदणी केली आहे, अशा सर्व मतदारांची नाव ही या निवडणुकीसाठी ग्राह्य धरली जाणार आहेत. म्हणजेच १ जुलैनंतर जर तुम्ही नाव नोंदवलं असेल तर तुमचं नाव या निवडणुकीसाठीच्या मतदार यादीत येणार नाही. तुम्हाला थेट पुढच्याच निवडणुकीत मतदानाचा हक्क बजावता येईल.

निवडणुका कधी?

निवडणूक आयोगाच्या घोषणेनुसार, राज्यातील सर्व २९ महापालिकांसाठी ही निवडणूक होणार असून १५ जानेवारी २०२६ रोजी सर्वच महापालिकांसाठी मतदान पार पडणार असून दुसऱ्याच दिवशी १६ जानेवारी २०२६ रोजी मतमोजणी पार पडणार आहे. सर्व महापालिकांमध्ये मिळून एकूण २,८६९ जागांसाठी ही निवडणूक होणार आहे.