Ashok Chavan News : 'अशोक चव्हाणांना एवढी कशाची भीती वाटतेय...? त्यांची ED, CBIकडे तक्रार झालीय का?'

मुंबई : माजी मुख्यमंत्री अशोक चव्हाण यांना कशीतरी भीती वाटत असेल. आताच का त्यांना भीती वाटतेय. त्यांना हे आजच का बोलावं लागलं. ईडी , सीबीआयकडे त्यांच्याबद्दल काही तक्रारी तर झाल्या नाहीत ना, हेही बघावे लागेल, खोचक टोला भारतीय जनता पक्षाचे प्रदेशाध्यक्ष चंद्रशेखर बावनकुळे यांनी माजी मंत्री अशोक चव्हाणांना लगावला. (What is Ashok Chavan afraid of : Chandrashekhar Bawankule)

केंद्र आणि राज्य सरकारच्या विरोधात बोललं की ईडी, सीबीआयच्या चौकशा मागे लागतात, असे विधान माजी मुख्यमंत्री तथा आमदार अशोक चव्हाण यांनी केले होते. त्यावर बोलताना भारतीय जनता पक्षाचे प्रदेशाध्यक्ष चंद्रकांत बावनकुळे (Chandrashekhar Bawankule) यांनी चव्हाणांवर निशाणा साधला.

बावनकुळे म्हणाले की, या देशात ईडी, सीबीआय, आणीबाणी यांचा वापर करण्याची काँग्रेस पक्षाची संस्कृती आहे. देशात ज्या ज्या वेळी काँग्रेसचे सरकार होते, त्या त्या वेळी त्यांनी जाणीवपूर्वक चौकशा लावल्या होत्या. त्यांची संस्कृती आणि संस्कार असल्यामुळे ते या संस्थांचा वापर करत होते. पण, मोदी सरकारच्या काळात कधीही या संस्थांचा गैरवापर झालेला नाही. कधीही ईडी आणि सीबीआयचा चुकीचा वापर झालेला नाही.

ईडी, सीबीआयकडे ज्या तक्रारी जातात, त्या तक्रारींच्या आधारे ते कारवाई करतात. त्या तक्रारीनुसार कोणाचीही चौकशी होऊ शकते. उद्या माझीही चौकशी होऊ शकते. पण, अशोक चव्हाण यांना आताच एवढी भीती का वाटतेय. अशोक चव्हाण यांची काय तक्रार ईडी, सीबीआयकडे झालेली आहे का; म्हणून ते अगोदरच हे सर्व सांगत आहेत, असेही ते म्हणाले.

विरोधी पक्षातील नेत्यांचं ठरलंय उद्या काय गडबड होणार असेल तर अगोदरच सांगून टाकतात. माझ्याविरोधात असं होणार आहे, म्हणून. मला वाटतंय, आमदार अशोक चव्हाण यांच्या विरोधात काही तक्रारी झालेल्या असतील, त्यामुळे त्यांनी घाबरून हे बोलणे सुरू केलेले दिसत आहे, असा टोमणाही बावनकुळे यांनी लगावला.