Sanjay Raut On MVA : 'जिंकेल त्याची जागा' ; महाविकास आघाडीच्या जागावाटप फॉर्म्युल्यावर राऊत यांचं सूचक वक्तव्य !

Mumbai News : राज्यातील सर्वच राजकीय पक्षांकडून आगामी काळात होणाऱ्या लोकसभा व विधानसभा निवडणुकीची जोरदार तयारी सुरु झाली आहे. सर्वच पक्ष बैठका घेऊन चाचपणी करीत असतानाच शिवसेना उद्धव ठाकरे गटाचे प्रवक्ते संजय राऊत यांनी महाविकास आघाडीत जागा वाटपावरुन कोणताही तिढा नाही, जो जिंकेल ती जागा त्यांची असणार आहे. विधानसभा निवडणुकीसाठी महाविकास आघाडीचा फॉर्म्युला ठरला असल्याचे सूतोवाच राऊतांनी केले आहे. (Latest Marathi News)

महाविकास आघाडीत जागा वाटपावरुन कोणतेही मतभेद नाही. जो जिंकेल ती जागा त्यांची असणार आहे. राज्य सरकार गेल्या काही दिवसांपासून निवडणुकीपासून पळ काढत आहे. राज्यातील महानगरपालिका आणि स्थानिक स्वराज्य संस्थांच्या निवडणुकाही घेत नाही. पराभवाच्या भीतीमुळे कोणत्याही निवडणुका सरकार घेत नसल्याचे, संजय राऊत यांनी म्हटले आहे.

"राज्य सरकारने भीतीमुळे मुंबई विद्यापीठाच्या सिनेटची निवडणूक रद्द केली असल्याचा आरोपही खासदार राऊत यांनी केला. दुसरीकडे माजी मुख्यमंत्री उद्धव ठाकरे यांनी लोकसभा निवडणुकीची तयारी सुरू केली आहे. मातोश्री निवासस्थानी लोकसभा निवडणुकांचा आढावा घेण्यात येत आहे. आढावा बैठकीचा आज तिसरा दिवस आहे. आज बारामती, मावळ, पुणे आणि शिरूर लोकसभा मतदारसंघांचा आढावा घेण्यात येणार आहे," असे राऊत म्हणाले.