RSS News: संघाची 100 वर्षे गांधी जयंतीदिनीच! मनुस्मृतीचं विसर्जन करा, संविधान स्विकारा; काँग्रेसचं स्वयंसेवकांना आवाहन, तयार केला खास प्लॅन

RSS News : भाजपची मातृसंस्था असलेल्या राष्ट्रीय स्वयंसेवक संघाला (RSS) उद्याच्या विजयादशमीला १०० वर्षे पूर्ण होत आहेत. २७ सप्टेंबर १९२५ रोजी असलेल्या विजयादशमीदिनी केशव बळीराम हेडगेवार यांनी RSSची स्थापना केली होती. पण संघाच्या या ऐतिहासिक दिनाचं वैशिष्ट्य म्हणजे उद्या २ ऑक्टोबर आहे अर्थात हा राष्ट्रपिता महात्मा गांधी यांचा जन्मदिवस आहे अर्थात उद्या गांधीजयंती देखील आहे. त्यामुळं हा विलक्षण योगायोग असल्याचं काँग्रेसनं म्हटलं आहे. या औचित्यानं संघानं मनुस्मृतीचं विसर्जन करुन संविधानाचा स्विकार करावा, असं आवाहन युवक काँग्रेसनं केलं आहे. यासाठी काँग्रेसनं खास प्लॅनही आयोजित केला आहे.

उद्या गांधी जयंती

महाराष्ट्र युवक काँग्रेसचे प्रदेशाध्यक्ष शिवराज मोरे यांनी नागपूरमध्ये पत्रकार परिषदेत सांगितलं की, "संघाला शंभर वर्षे पूर्ण होत आहेत, त्याच दिवशी महात्मा गांधींची जयंती आहे. त्यामुळं संघान मनुस्मृती विचारांचं विसर्जन करून संविधानाच्या विचाराचा स्वीकार करावा. यासाठी संघाला युथ काँग्रेसच्यावतीनं संविधानाच्या प्रति देणार असल्याचं त्यांनी पत्रकार परिषदेत सांगितलं. यासाठी त्यांनी पोलिसांना परवानगी मागितली आहे, पण जर पोलिसांनी परवानगी नाकारली तर पोस्टाद्वारे संविधान प्रति विविध जिल्ह्यांतून RSS च्या नागपूरच्या कार्यालयात पाठवल्या जाणार असल्याची माहितीही त्यांनी दिली.

युथ काँग्रेसचा प्लॅन काय?

उद्या युवक काँग्रेसच्यावतीनं संविधान वाटपाचं काम नागपूर शहरामध्ये केलं जाणार आहे. उद्या विजयादशमी अर्थात दसरा असल्यानं यानिमित्त आपण वाईट प्रवृत्तीवर मात करून चांगल्याची सुरुवात करत असतो. त्यामुळं उद्या योगायोगाने राष्ट्रीय स्वयंसेवक संघाला 100 वर्षे पूर्ण होत आहेत त्यामुळं उद्या हजारोंच्या संख्यने स्वयंसेवक नागपूरात उपस्थित राहतील. तर दुसरीकडं नागपुरातच दीक्षाभूमीवर बाबासाहेब आंबेडकरांनी आपल्या लाखो अनुयायांसह धर्मांतर केल्याचा ६९ व्या धम्मचक्र प्रवर्तन दिनाचा सोहळा साजरा होणार आहे. त्यासाठी लाखोंच्या संख्येनं लोक नागपूरमध्ये दाखल होणार आहेत.