LPG Supply Nagpur: नागपूर जिल्हाधिकाऱ्यांचा गॅस तुटवड्याबाबतचा दावा खरा की खोटा? VSA क्लबचं किचन बंद,गॅस एजन्सीसमोर लांबच लांब रांगा

Nagpur News : अमेरिका आणि इराणमधील युद्धाच्या झळा भारतीय बाजारपेठेला बसू लागल्या असून देशाच्या अनेक भागांत सिलिंडरचा तुटवडा निर्माण झाला आहे. चहाच्या टपऱ्यांपासून मोठ्या हॉटेलपर्यंत सर्वांचीच गॅस अभावी कोंडी झाली असताना, नागपूरचे जिल्हाधिकारी विपीन इटनकर यांनी मात्र जिल्ह्यात सिलिंडरची कोणतीही टंचाई नसल्याचा दावा केला आहे. शहरात एकही हॉटेल बंद पडलेले नाही आणि सिलिंडरचा पुरवठा सुरळीत सुरू असल्याचे त्यांनी म्हटले असले तरी, प्रत्यक्षात मात्र व्यावसायिक सिलिंडर उपलब्ध नसल्याने व्हीसीए क्लबसारख्या मोठ्या ठिकाणचे किचन बंद करण्याची वेळ आली आहे.

जिल्हाधिकारी इटनकर यांनी आज परिस्थितीचा आढावा घेतल्यावर सांगितले की, सिलिंडर टंचाईच्या चर्चा केवळ अफवा असून नागरिकांमध्ये अनावश्यक भीती निर्माण केली जात आहे. "माझ्याकडे एकानेही सिलिंडर मिळत नसल्याची तक्रार केलेली नाही. हॉटेल व्यावसायिकांकडे चार ते पाच दिवस पुरेल इतका साठा उपलब्ध आहे. भविष्यातील धोका आणि युद्धाची परिस्थिती लक्षात घेऊन केवळ खबरदारी म्हणून सिलिंडरचे रेशनिंग केले जात आहे," असे स्पष्टीकरण त्यांनी दिले.

या रेशनिंगनुसार, एकदा सिलिंडर घेतल्यावर पुढील 25 दिवस दुसरे बुकिंग घेता येणार नाही, जेणेकरून काळाबाजार रोखता येईल आणि घरगुती ग्राहकांना वेळेत पुरवठा होईल, असेही त्यांनी नमूद केले. घरगुती ग्राहकांनी तातडीने 'केवायसी' अपडेट करावे, अशा सूचनाही प्रशासनाकडून देण्यात आल्या आहेत.

एककीकडे जिल्हाधिकारी परिस्थिती नियंत्रणात असल्याचा दावा करत असताना, दुसरीकडे शहरातील चित्र मात्र अत्यंत गंभीर दिसत आहे. व्यावसायिक सिलिंडरचा पुरवठा ठप्प झाल्याने अनेक व्यावसायिकांचे कंबरडे मोडले आहे. व्हीसीए क्लबसारख्या प्रतिष्ठित ठिकाणचे किचन बंद झाल्याने प्रशासनाचा दावा फोल ठरत असल्याची चर्चा आहे.

गॅस एजन्सींच्या बाहेर ग्राहकांच्या लांबच लांब रांगा लागल्या असून, एजन्सींकडून फोनही उचलले जात नसल्याने नागरिकांचा संताप अनावर होत आहे.प्रशासनाचे 'रेशनिंग' आणि 'काळाबाजारावर नियंत्रण' हे शब्द कागदावरच मर्यादित असून सर्वसामान्यांना मात्र गॅससाठी वणवण करावी लागत आहे, हेच वास्तव नागपुरात (Nagpur) सध्या पाहायला मिळत आहे.