Manikrao Kokate यांची आमदारकी वाचणार? नाशिक सत्र न्यायालयाची शिक्षेला स्थगिती

Nashik News : मंत्री माणिकराव कोकाटे यांच्या शिक्षेला नाशिक जिल्हा न्यायालयाने स्थगिती दिली आहे. त्यांच्यासाठी हा मोठा दिलासा मानला जात आहे. या निर्णयामुळे त्यांची आमदारकी वाचण्याची शक्यता आहे. सदनिका खरेदी करताना बनावट कागदपत्र दिल्याचा आणि खोटे उत्पन्न दाखवल्याचा त्यांच्यावर आरोप आहे. या प्रकरणी त्यांना कनिष्ठ न्यायालयाने दोन वर्षांची शिक्षा सुनावली होती.

या शिक्षेविरोधात कोकाटे यांनी नाशिक जिल्हा न्यायालयात अपिल केले होते. याची सुनावणी आज (24 फेब्रुवारी) पार पडली. यावेळी न्यायालयाने कोकाटे (Manikrao Kokate) यांना तात्पुरता दिलासा देत शिक्षेला स्थगिती दिली आहे. तसेच एक लाख रूपयांच्या जातमुचलक्यावर त्यांना जामीनही मंजूर केला आहे.

या सगळ्याबाबत कोकाटे यांच्या वकिलांनी सांगितले की, अपिल प्रकरण संपेपर्यंत शिक्षेला स्थगिती मिळाली आहे. तसेच जामीन मंजूर झाला आहे. दोन वर्षांच्या अपात्रतेचा जो प्रश्न आहे, त्यावर न्यायालय उद्या स्वतंत्र ऑर्डर करणार आहे. त्यासंबंधी सरकारी वकील आपली बाजू मांडणार आहेत.

जाणकारांच्या मते शिक्षेला स्थगिती मिळाली याचा अर्थ कोकाटे यांच्या आमदारकीला कोणताही धोका राहणार नाही. राहुल गांधी (Rahul Gandhi) यांच्याबाबतही सुरत न्यायालयाच्या शिक्षेला सर्वोच्च न्यायालयाने स्थगिती दिली आहे. त्यामुळे त्यांची खासदारकीही बहाल करण्यात आली होती. थोडक्यात कोकाटे यांची आमदारकी आता वाचणार हे जवळपास निश्चित आहे.

कोकाटे यांच्यावर काय होते आरोप?

सिन्नर शहरातील येवलेकर मळा या उच्चभ्रू परिसरातील नागरी कमाल जमीन धारणा कायदा अंतर्गत अतिरिक्त जमिनीवर सदनिका बांधकाम करण्यात आले होते. त्यामध्ये केवळ आर्थिक दुर्बल आणि घर नसलेल्या व्यक्ती अशी पात्रता होती. त्यासाठी कोकाटे बंधूंनी बनावट पुरावे सादर करून आर्थिक दुर्बल असल्याचे शासनाला सांगितले होते.

यामध्ये शासनाची फसवणूक झाल्याची तक्रार तत्कालीन आमदार आणि मंत्री तुकाराम दिघोळे यांनी केली होती. दिघोळे यांनीच या प्रकरणाचा प्रदीर्घ काळ पाठपुरावा केला होता. याच दरम्यान, 30 नोव्हेंबर 2019 मध्ये दिघोळे यांचे निधन झाले. पण त्याचा निकाल नुकताच लागला. यात कोकाटे यांना दोन वर्षांची शिक्षा सुनावण्यात आली आहे.