Sharad Pawar NCP: शरद पवार यांच्या माजी आमदाराकडून महावितरणची कोंडी; स्मार्ट मीटर नकोच!

MSEDCL smart meter opposition: महावितरण कंपनीकडून स्मार्ट मीटर बसविण्याचा आग्रह धरला जातो. ग्राहकांचा विरोध असतानाही मीटर बसविण्याच्या तक्रारी आहेत. या प्रश्नावर सटाण्यात वातावरण चांगलेच तापले आहे.

राष्ट्रवादी काँग्रेस शरदचंद्र पवार पक्षातर्फे सटाणा येथे स्मार्ट मीटरला विरोध होत आहे. यावेळी माजी आमदार संजय चव्हाण यांच्या नेतृत्वाखाली महावितरण विरोधात ठिय्या आंदोलन करण्यात आले. त्यात मोठ्या संख्येने वीज ग्राहक आणि पक्षाचे कार्यकर्ते सहभागी झाले.

स्मार्ट मीटर बसविण्यास नागरिकांचा तीव्र विरोध आहे. हे मीटर बसविल्यानंतर ग्राहकांची लूट होत आहे. विजेचा वापर न वाढता देखील बिल मात्र दुपटीने वाढत असल्याचा तक्रारी आहे.

आंदोलकांनी आक्रमक भूमिका घेतल्याने महाविरतरण विरोधात मोठ्या प्रमाणावर घोषणा देण्यात आल्या. वीज वितरण अभियंत्यांची यावेळी चर्चा करण्यात आली. स्मार्ट मीटर मध्ये अनेक त्रुटी मांडण्यात आल्या.

एकीकडे महागाई वाढत आहे. दुसरीकडे विजेचा वापर न करताही महावितरण दुपटीने वसुली करीत आहे. त्यामुळे शेतकरी आणि नागरिकांमध्ये मोठ्या प्रमाणावर संताप आहे. ही परिस्थिती लक्षात घेऊन महावितरणने कोणत्याही स्थितीत स्मार्ट मीटर बसविण्याचा आग्रह धरू नये.

ग्राहकाकडून लिखित परवानगी घेतल्याशिवाय मीटर बसविल्यास त्याची सर्व जबाबदारी अधिकाऱ्यांवर राहील असा इशारा यावेळी देण्यात आला. त्यानंतर अभियंत्यांनी आंदोलकांची मागणी मान्य करीत लिखित संमतीशिवाय मीटर बसविणार नाही, असे आश्वासन दिल्याचा दावा आमदार चव्हाण यांनी केला.

राज्यभरात स्मार्ट मीटर बसविण्यास विरोध आहे. त्या विरोधात विधिमंडळात देखील आमदारांनी आक्रमक भूमिका घेतली होती. काही ग्राहक उच्च न्यायालयात त्या विरोधात दाद मागत आहेत. या स्मार्ट मीटरचा विषय चांगलाच तापला आहे.

यावेळी राष्ट्रवादी काँग्रेस अजित पवार पक्षाचे पदाधिकारी यशवंत सोनवणे, रामू पवार, प्रा. चंद्रकांत सोनवणे, स्वप्निल सोनवणे, केदा सोनवणे, प्रज्वल भामरे, रोहन तांबोळी यांसह विविध पदाधिकारी आणि वीज ग्राहक आंदोलनात सहभागी झाले होते. वीज मीटर तपासणी आणि वापर न वाढताय झालेल्या बिलातील वाढीची उदाहरणे आणि माहिती यावेळी सादर करण्यात आली. काही ग्राहकांनी स्मार्ट मीटर सोबत आणले होते.