पुण्यातल्या पावसावरून दोन दादांमध्ये जुंपली...

मुंबई : पावसाने थैमान घातल्याने पुणेकर पाण्यात अडकले असतानाच सत्ताधारी आणि विरोधकांमुळे मुंबईत आरोप-प्रत्यारोपांच्या धारा कोसळत राहिल्या. पुण्यातील एकमेकांचा कारभार जबाबदार असल्याचे सांगत आजी-माजी कारभाऱ्यांनी अर्थात, पालकमंत्री चंद्रकांत पाटील (Chandrakant Patil)आणि विधानसभेतील विरोधी पक्ष नेते अजित पवार (Ajit Pawar) यांनी परस्परांच्या सत्ताकाळ उघडा पाडला. (Ajit Pawar & Chandrakant Latest News)

दरम्यान, उणीदुणी काढण्यातून पुण्यातील धोकादायक स्थितीची चौकशी करण्यापलीकडे काही साध्य झाले नसल्याचे दिसून आले आहे. परतीच्या पावसामुळे सोमवारी (ता.१७ ऑक्टोबर) रात्री धुमाकूळ घातल्याने पुण्यातील रस्ते, वस्त्या आणि सोसायट्यांत पाणी शिरून नागरिकांचे प्रचंड हाल झाले. त्यावरून पुणे महापालिकेतील नव्या-जुन्या म्हणजे, भारतीय जनता पक्ष आणि राष्ट्रवादी काँग्रेसच्या नेत्यांनी एकमेकांच्या कारभाराला दोष दिले. या राजकीय वादाचे पडसाद राज्याच्या वर्तुळातही उमटले दिसले.

स्मार्टसिटीचे स्वप्न दाखवून भाजपने पुणे शहराचे वाटोळे केल्याचा घणाघात पवार यांनी भाजप नेत्यांवर केला. तर अडीच वर्ष पुण्याचे पालकमंत्रीपद असूनही काहीच केलं नसल्याचा आरोप करत पाटील यांनी पवारांवर पटलवार केला.

दरम्यान, काल रात्री झालेल्या मुसळधारमुळे पुण्याची दैना झाली आहे. यामुळे पुण्यातील स्मार्टसिटीचे वास्तव चित्र पुणेकरांना पुन्हा एकदा नव्याने बघायला मिळाले. यामुळे राजकीय मंडळी निव्वळ राजकीय आरोप-प्रत्यारोपातच गुतंलेल्याचं चित्र दिसत आहे.