Ajit Pawar Plane Crash : 'धावपट्टीला टच होताच भयंकर स्फोट अन्...' अजित पवारांच्या विमानाचा अपघात नेमका कसा झाला?

Ajit Pawar Plane Crash News : संपूर्ण महाराष्ट्रासह देशाला हादरवणारी बातमी समोर आली आहे. ती म्हणजे आज बुधवारी (ता.२८) सकाळी उपमुख्यमंत्री अजित पवार यांच्या विमानाचा बारामती येथे मोठा अपघात झाला. या अपघातामध्ये अजित पवारांचा दुर्दैवी मृत्यू झाला आहे.

या विमान अपघातामध्ये अजित पवारांसह सहा जणांचा मृत्यू झाल्याची माहिती डीजीसीएने दिली आहे. या बातमीमुळे संपूर्ण महाराष्ट्रावर शोककळा पसरली आहे. अनपेक्षित घडलेल्या या घटनेमुळे राज्यातील राजकारणासह समाजकारणात एकच खळबळ उडाली आहे.

दरम्यान, अजित पवारांच्या विमानाचा अपघात नेमका कसा झाला याबाबतची माहिती समोर आली आहे. मिळालेल्या माहितीनुसार, उपमुख्यमंत्री अजित पवार यांची आज बारामतीमध्ये प्रचार सभा होणार होती. या सभेसाठी ते विमानाने सकाळी बारामतीला निघाले होते. बारामतीतील बारामती एअरपोर्टजवळ अजितदादांच्या विमानाचे लँडिंग होत असतानाच विमान अचानक कोसळले.

तर हा अपघात नेमका कसा झाला येथील स्थानिकांनी सांगितलं. प्रत्यक्षदर्शीं म्हणाले, आम्ही या ठिकाणी शेकोटी केलेली. त्यावेळी वरून आलेलं विमान आम्हाला दिसलं. सकाळी पहिल्यांदा विमान गेलं ते फिरून गावाकडून आलं. त्यानंतर खाली धावपट्टीला टच होताच मोठा स्फोट झाला आमच्या घरापर्यंत विमानाचे पार्ट आले आणि अचानक मोठा स्फोट झाला. शिवाय यावेळी विमान पलटी झाल्याचंही प्रत्यक्षदर्शींनी सांगितलं आहे.

दरम्यान, या अपघातानंतर घटनास्थळावर विमानाच्या वेगवेगळे पार्ट विखुरले होते. शिवाय त्यानंतर तत्काळ पोलिस, अग्निशमन दलाने घटनास्थळी धाव घेतली आणि अजित पवारांसह सर्व जखमींना तात्काळ रुग्णालयात दाखल केलं.

मात्र, रुग्णालयामध्ये उपचारादरम्यान ६ जणांचा मृत्यू झाल्याची माहिती समोर आली. या मृतांमध्ये पायलट, सुरक्षारक्षकासह अजित पवारांचा देखील मृत्यू झाला आहे. या अपघातामुळे संपूर्ण राज्यावर शोककळा पसरली असून देशभरात बारामतीत एकच खळबळ उडाली आहे.