Amit Shah Vs Sharad Pawar : कोणताही चौक निवडा, मोहोळ हिशेब घेऊन येतील; शहांचं पवारांना ओपन चॅलेंज!

Pune Political News : राज्यातील आगामी विधानसभा निवडणुकीच्या पार्श्वभूमीवर भाजपचे पुण्यात अधिवेशन झाले. त्यावेळी केंद्रीय गृहमंत्री अमित शहा यांनी राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्यावर जोरदार हल्लाबोल केला.

या दरम्यान केंद्रीय मंत्री मुरलीधर मोहोळ Murlidhar Mohol यांचा अमित शहा यांनी केलेला उल्लेख पुण्यात चर्चेचा विषय ठरत आहे.

लोकसभा निवडणुकीमध्ये भाजपाचे पीछेहाट झाल्यानंतर आता आगामी विधानसभा निवडणुकीसाठी भाजपकडून मोर्चेबांधणी करण्यात येत आहे. पुण्यातील बालेवाडी येथील क्रीडा संकुलात अधिवेशनाचे आयोजन करण्यात आले होते.

या अधिवेशनाला राज्यभरातून पाच हजाराहून अधिक कार्यकर्ते पदाधिकाऱ्यांनी उपस्थित लावली होती. या पदाधिकाऱ्यांना उपमुख्यमंत्री देवेंद्र फडणवीस Devendra Fadnavis यांच्यासह केंद्रीय मंत्री अमित शहा यांनी मार्गदर्शन केले.

अमित शहा Amit Shah म्हणाले, मराठा आरक्षणाचा प्रश्न हा शरद पवारांमुळेच प्रलंबित राहिला. भाजपचे सरकार महाराष्ट्रात आल्यानंतर मराठा समाजाला आरक्षण मिळते, मात्र शरद पवारांचे सरकार आल्यानंतर हे आरक्षण गायब होते. आता राज्यात भाजपचे सरकार असून मराठा आरक्षणासाठी हालचाली सुरू आहेत. पुढे शरद पवारांचे सरकार आले तर आरक्षण पुन्हा गायब होईल, अशी टीका शहांनी केली.

शरद पवार ज्या विकासावर बोलतात त्याबाबत मी त्यांना प्रश्न विचारायला पुण्यात आलो आहे. दहा वर्षे केंद्रात आणि राज्यांमध्ये शरद पवार यांचे सरकार होते. त्या काळात शरद पवार यांनी राज्याला काय दिले? असा खडा सवालच शहांनी पवारांना केला आहे.

आघाडी सरकारच्या दहा वर्षांच्या कालखंडामध्ये महाराष्ट्राला केंद्राकडून एक लाख 91 हजार करोड निधी मिळाला होता. मोदी यांच्या दहा वर्षांत महाराष्ट्राला दहा लाख पाच हजार करोड इतका निधी दिला आहे. या आकडेवारीवर शरद पवारांना विश्वास नसेल तर पुण्यातील कोणताही चौक निवडा, आमचे मुरलीधर मोहोळ हे हिशेब घेऊन उभे राहतील, असे आव्हानच शहांनी शरद पवारांना दिले.

(Edited by Sunil Dhumal)