Amol Mitkari News : अजितदादा २०२४ मध्ये मुख्यमंत्री होतील; अमोल मिटकरींचा विश्वास

Baramati News : मुख्यमंत्री एकनाथ शिंदे शिवसेनेच्या आमदारांच्या अपात्रतेसंदर्भात हालचालींना वेग आला आहे. त्यामुळे एकनाथ शिंदे अपात्र ठरले तर महाराष्ट्राच्या मुख्यमंत्रिपदावर कुणाची वर्णी लागणार ? याबाबत राजकीय वर्तुळात विविध तर्क लावले जात आहेत. अजित पवार यांनी भाजप सोबत युती केल्यापासून त्यांच्या मुख्यमंत्रिपदाची चर्चा सुरू आहे.

अशातच आता अजित पवार गटाचे आमदार अमोल मिटकरी यांनी मोठे विधान केले आहे. २०२४ मध्ये अजित पवार (Ajit Pawar) जास्तीत जास्त आमदार निवडून आणतील. त्यानंतर ते महाराष्ट्राचे मुख्यमंत्री होतील, असे विधान मिटकरी यांनी केले. त्यामुळे राजकीय वर्तुळात जोरदार चर्चा सुरू आहे. मिटकरी आज बारामतीच्या दौऱ्यावर होते.

अजित पवार कधी मुख्यमंत्री होतील ? असा प्रश्न मिटकरी यांना विचारण्यात आला होता. त्यावर ते म्हणाले, १४५ चा आकडा जोपर्यंत येणार नाही, तोपर्यंत कुणीही मुख्यमंत्री होऊ शकत नाही. मग ते उपमुख्यमंत्री देवेंद्र फडणवीस (Devendra Fadnavis) किंवा अजित पवार असाेत...तुम्हीपण घाई करू नका. अजित पवार हे २०२४ च्या निवडणुकीत जास्त आमदार निवडून आणतील आणि राज्याचे मुख्यमंत्री होतील.

अजित पवार महाराष्ट्राचे मुख्यमंत्री झाले पाहिजेत, असे मला एक कार्यकर्ता म्हणून वाटते. आमच्या पक्षाचे बंड आणि मुख्यमंत्री एकनाथ शिंदे (Eknath Shinde) यांचे बंड वेगळे आहे. असे आमचे नेते प्रफुल्ल पटेल यांनी सांगितले आहे. अजित पवार यांनीही त्यावर स्पष्टीकरण दिले आहे. त्यामुळे निवडणूक आयोग जो निर्णय देईल तो आम्हाला मान्य असले, असे मिटकरी यांनी स्पष्ट केले.

Edited by : Amol Jaybhaye