Vanraj Andekar : वनराजच्या खुनाचा बदला घेणार का? बंडू आंदेकर म्हणाला, नेकी का काम और...

Vanraj Andekar Murder Case : पुण्यात मारणे, मोहोळ, आंदेकर, घायवळ, पोटे, बोडके अशा गुंडांच्या टोळ्या आहेत. या टोळ्यांमध्ये गँगवॉर होत राहते. मात्र, गेल्या काही वर्षांपासून 'शांत' असलेले पुणे पुन्हा 'अशांत' झाले आहे. कारण, शरद मोहोळ याच्या खूनानंतर आंदेकर टोळीतील म्होरक्या सुर्यकांत उर्फ बंडू आंदेकर याचा मुलगा माजी नगरसेवक वनराज आंदेकर यांचा खून करण्यात आला. यामुळे पुन्हा टोळीयुद्ध भडकणार का? अशी शंका उपस्थित होत आहे.

कौटुंबिक कारण आणि पुर्ववैमनस्यातून माजी नगरसेवक वनराज आंदेकर यांचा खून करण्यात आला. वनराज आंदेकर यांच्या खुनाचा बदला आंदेकर टोळी घेणार, ते शांत बसणार नाहीत, अशी चर्चा गुन्हेगार, पोलिस आणि सर्वसामान्यांमध्ये रंगली आहे. मात्र, यावर वनराज यांचे वडील, गुंड बंडू आंदेकरने प्रतिक्रिया व्यक्त केली आहे. तो एका वृत्तवाहिनीशी संवाद साधत होता.

सख्खी बहीण पक्की वैरी झाली...

बंडू आंदेकर म्हणाला, "नेकी का काम... आंदेकर का नाम... आम्ही काही करणार नाही. हे वचन देत आहे. पण, वनराजला दोन मुली आहेत. आता मी काही केलं, तर त्यांच्याकडे कोण पाहणार? वनराजचा प्रपंच उघड्यावर पाडण्यात आला आहे. सख्खी बहीण पक्की वैरी झाली. जावई जयंत कोमवर आणि सोमनाथ उर्फ सोम्या गायकवाड हे एकत्र येऊन वनराजचा खून केला. कोमकर कुटुंबाला वनराजला मारता आलं नाही."

ही काळ्या दगडावरची रेष...

"माझ्या मुलाला मारलं म्हणून मी कोणाला मारणार नाही. मला माझ्या मुलाला नैसर्गिक न्याय द्यायचा आहे. कृष्णराज आंदेकरला सुद्धा काही करायचं नाही, म्हणून सांगितलं आहे. ही काळ्या दगडावरची रेष आहे," असं बंडू आंदेकरनं म्हटलं.

मला अन् कृष्णराजला मारता आलं नाही...

"संजीवनी जयंत कोमकर ( वनराज आंदेकर यांची बहीण ), जयंत कोमकर, प्रकाश कोमकर यांनी सोम्या गायकवाडशी हातमिळवणी केली होती. सर्वांनी मला आणि कृष्णराज आंदेकरला मारायचा कट रचला होता. मात्र, मला आणि कृष्णराज याला मारता येत नव्हते. त्यामुळे गणेश कोमकरने सोमनाथ गायकवाडच्या टोळीशी आर्थिक देवाण-घेवाण करून वनराजचा खून केला," असा आरोप बंडू आंदेकर यांनी केला.

वनराज यांच्या खूनप्रकरणी अनेकांना अटक...

वनराज आंदेकर यांच्या खून प्रकरणात बहीण संजीवनी कोमकर, तिचा पती जयंत कोमकर, प्रकाश कोमकर, गणेश कोमकर, सोमनाथ उर्फ सोम्या गायकवाड यांच्यासह 13 जणांना पोलिसांनी अटक केली आहे. कोमकर कुटुंबानं रागातून आणि सोम्या गायकवाडनं पुर्ववैमनस्यातून कट रचत वनराज आंदेकर यांचा खून केल्याचं तपासात समोर येत आहे.