Vanraj Andekar : वनराज यांच्या खुनाचा कट कुणी रचला, टीप कोणी दिली? बंडू आंदेकरने सगळंच सांगितलं...

Vanraj Andekar Murder Case : आंदेकर टोळीचा म्होरक्या, गुंड बंडू आंदेकर याचा मुलगा आणि राष्ट्रवादी काँग्रेस पक्षाचे माजी नगरसेवक वनराज आंदेकर यांच्यावर 1 ऑगस्टच्या रात्री नाना पेठेथील राहत्या घराजवळ गोळ्या झाडून कोयत्यानं सपासप वार करत खून केला होता. कौटुंबिक कारण आणि पुर्ववैमनस्यातून हा खून झाल्याचं प्राथमिक तपासात समोर येत आहे.

वनराज आंदेकर यांच्या खूनप्रकरणी बहीण संजीवनी आंदेकर तिचा पती जयंत कोमकर, प्रकाश कोमकर, गणेश कोमकर आणि सोमनाथ उर्फ सोम्या गायकवाड यांच्यासह काहीजणांना पोलिसांनी अटक केली आहे. मात्र, वनराज यांच्या हत्येचा कट कुणी रचला, कुणी टीप ( माहिती ) दिली, याबद्दल आंदेकर टोळीचा म्होरक्या बंडू आंदेकरने याने माहिती दिली आहे. तो एका वृत्तवाहिनीशी बोलत होता.

बंडू आंदेकर म्हणाला, "संजीवनी जयंत कोमकर ( वनराज आंदेकर यांची बहीण ), जयंत कोमकर, प्रकाश कोमकर यांनी सोम्या गायकवाडशी हातमिळवणी केली होती. सर्वांनी मला आणि कृष्णराज आंदेकरला मारायचा कट रचला होता. मात्र, मला आणि कृष्णराज याला मारता येत नव्हते. त्यामुळे गणेश कोमकरने सोमनाथ गायकवाडच्या टोळीशी आर्थिक देवाण-घेवाण करून वनराज आंदेकर यांचा खून केला."

"नाना पेठेतील डोके तालीम चौकात नेहमी वनराज उभे असायचे. गणेशोत्सव, नवरात्रोत्सवाला वनराज मदत करत असतं. त्यादिवशीही टोळक्यानं पोर वर्गणी मागण्यासाठी आल्याचं वनराज यांना वाटलं. मात्र, टोळक्यानं आल्या-आल्या थेट फायरिंग आणि कोयत्यानं वनराज आंदेकर यांच्यावर हल्ला केला," असं बंडू आंदेकरने सांगितलं.

"शेजारी पाणपोई असल्यानं वनराज यांना पळता आलं नाही. वनराज यांचा चुलत भाऊ शिवम आंदेकर यांना शंका आल्यानं त्यांनी पळ म्हणून सांगितलं होतं. पण, हल्लेखोरांनी पहिली गोळी शिवमवर चालवली. ती गोळी शिवमने हुकवली. शिवम एका बाजूला, तर वनराज दुसऱ्या बाजूला पळाले," असंही बंडू आंदेकरने म्हटलं.

"वनराज यांची खरी टीप ( माहिती ) संजीवनी कोमकर आणि जयंत कोमकर यांनी गॅलरीत उभे राहून दिली होती. वनराज कुठे असतो, केव्हा बाहेर येतो, अंगावर कोणते कपडे घालतो, याचीही माहिती देण्यात आली होती. ही टीप मिळाल्यानंतर वनराज यांना घेरून खून करण्यात आला," असं बंडू आंदेकर म्हणाला.