Baramati election update : बारामतीत मोठी घडामोड; अजितदादा प्रत्येक प्रभाग पिंजून काढत असतानाच 2 जागांवरील निवडणूक लांबणीवर

Maharashtra local body elections : बारामती नगरपरिषदेच्या निवडणुकीत मोठी घडामोड समोर आली आहे. नगरपरिषदेत पुन्हा सत्ता काबीज करण्यासाठी उपमुख्यमंत्री अजित पवार यांनी कंबर कसली आहे. या निवडणुकीत राष्ट्रवादी आठ उमेदवार यापूर्वीच बिनविरोध निवडून आले आहे. तर नगराध्यक्ष व उर्वरित जागांसाठी प्रचार शिगेला पोहोचलेला असतानाच दोन जागांवरील निवडणूक लांबणीवर पडली आहे.

न्यायालयीन प्रक्रियेच्या पार्श्वभूमीवर बारामती नगरपरिषदेच्या दोन प्रभागांतील निवडणूक पुढे जाणार असल्याचे आज स्पष्ट झाले. प्रभाग १७ अ , तसेच प्रभाग १३ ‘ब’मधील उमेदवारांचे अर्ज जिल्हा न्यायालयाने दिलेल्या आदेशानुसार स्वीकारले. या दोन जागांसाठी २६ नोव्हेंबर रोजी उमेदवारी अर्ज स्वीकारले आहेत. या दोन नामनिर्देशन पत्रांबाबत पुढील प्रक्रियेविषयी (छाननी, उमेदवारी माघारी घेणे, आदी) राज्य निवडणूक आयोगाकडून सुधारित कार्यक्रम प्राप्त झाल्यानंतर पुढील प्रक्रिया राबविण्यात येणार आहे.

निवडणूक निर्णय अधिकाऱ्यांनी प्रसिद्धीपत्रकाद्वारे ही माहिती दिली आहे. उमेदवारी अर्ज वेळेत न आल्याने सतीश फाळके व अविनाश गायकवाड या दोन उमेदवारांना उमेदवारी अर्ज दाखल करता आले नव्हते. त्या विरोधात त्यांनी न्यायालयात दाद मागितली होती. दोन्ही बाजूंचा युक्तिवाद ऐकून न्यायालयाने निवडणूक निर्णय अधिकाऱ्यांना या दोन्ही उमेदवारांचे अर्ज स्वीकारण्याचे आदेश दिले होते.

न्यायालयाच्या आदेशानुसार २६ नोव्हेंबर रोजी दोघांनी अर्ज दाखल केल्याने आता या दोन्ही प्रभागातील निवडणूक प्रक्रीया पुढे जाणार आहे. या दोन जागा वगळून नगराध्यक्ष व इतर सर्व जागांसाठीचा उर्वरित निवडणूक कार्यक्रम राज्य निवडणूक आयोगाच्या पूर्वनिर्धारित वेळापत्रकानुसारच पार पडणार आहे. मतमोजणीदेखील या दोन जागा वगळता ३ डिसेंबर रोजी होणार असल्याचे सूत्रांनी स्पष्ट केले.

दरम्यान, सुप्रीम कोर्टात ओबीसी आरक्षणाबाबत आज सुनावणी होणार आहे. राज्यातील स्थानिक स्वराज्य संस्थांमध्ये अनेक ठिकाणी आरक्षणाची मर्यादा ५० टक्क्यांच्या पुढे गेली आहे. त्यावर सुप्रीम कोर्टाने नाराजी व्यक्त केली आहे. आज कोर्टाकडून या ठिकाणच्या मतदानाबाबत महत्वाचा आदेश दिला जाण्याची शक्यता आहे.