Yogesh Tilekar : कचरा प्रकल्पात मोठा घोटाळा? भाजप आमदाराचा हात आणि फडणवीसांची साथ काँग्रेसचा गंभीर आरोप

Yogesh tilekar controversy latest news: पुणे महानगरपालिकेतील कचरा व्यवस्थापन प्रकल्प भ्रष्टाचाराचे केंद्र बनला असून, भाजप आमदार टिळेकर यांच्या नातेवाईकांच्या 'भूमी ग्रीन' कंपनीला विना निविदा मोठा ठेका देण्याचा प्रयत्न सुरू असल्याचा आरोप काँग्रेस शहराध्यक्ष अरविंद शिंदे यांनी केला आहे. या प्रकरणात उपमुख्यमंत्री देवेंद्र फडणवीस यांनीही हस्तक्षेप केल्याचा दावा त्यांनी पत्रकार परिषदेत केला.

स्थायीच्या मंगळवारी झालेल्या बैठकीत महापालिका क्षेत्रातील कचऱ्यावर प्रक्रिया करणाऱ्या एका कंपनीला काम देण्याचा प्रस्ताव प्रशासनाने सादर केला. त्यास स्थायी समितीमधील विरोधी पक्षातील सदस्यांनी विरोध केला. त्यानंतर आता काँग्रेसने आक्रमक भूमिका घेतली आहे.

शहरात दररोज १००० ते ११०० मेट्रिक टन ओला कचरा निर्माण होत असताना, विविध कंपन्यांना मिळून १७७५ मेट्रिक टन क्षमतेच्या प्रकल्पचे काम दिले गेले आहे, त्यात 'भूमी ग्रीन' कंपनीला देखील त्यातील मोठ्या प्रमाणात काम मिळाले आहे. प्रत्यक्ष कचरा कमी असतानाही जादा क्षमतेच्या प्रकल्पांद्वारे बिले उचलून मोठ्या प्रमाणात भ्रष्टाचार जात असल्याचा आरोप काँग्रेसने केला आहे.

गेल्या चार वर्षांत 'भूमी ग्रीन'ने एका प्रकल्पातूनच पालिकेकडून १९ कोटी रुपये घेतले असून, दीर्घकालीन करारांमुळे पुढील २०-३० वर्षांत पुणे महानगरपालिकेवर ७०० ते ७५० कोटींचा आर्थिक बोजा पडू शकतो, असा दावा शिंदे यांनी केला आहे. तसेच रस्त्यांवर अजूनही कचरा पडून राहत असताना एवढा मोठा खर्च संशयास्पद असल्याचे त्यांनी नमूद केले आहे.

शिंदे यांनी पुढे सांगितले की, यापूर्वी देखील कचरा प्रक्रिये बाबत ९७० रुपये प्रति मेट्रिक टन दराने निविदा काढण्यात आली होती. मात्र दर अधिक असल्याबाबत तक्रारीनंतर स्पर्धात्मक निविदा प्रक्रिया राबवण्यात आली त्यानंतर हा दर ५५० रुपयांपर्यंत खाली आला होता. आता पुन्हा जास्त दराने आणि विना निविदा प्रस्ताव पुढे येत असल्याने मोठा घोटाळा होण्याचा संशय वाढला आहे असं काँग्रेसचे म्हणणं आहे.

तसेच कचरा प्रकल्पांमधील अनियमिततेवरून सत्ताधारी आणि मागील सर्व काळातील प्रकल्पांचे स्वतंत्र ऑडिट करण्याची मागणी काँग्रेसने केली आहे मात्र त्यावर कोणतीही कारवाई झालेली नाही. त्यामुळे आता या कंपनीला विना निविदा काम दिले जाऊ नये तसेच झाल्यास आंदोलन करण्याचा इशारा काँग्रेसने दिला आहे.