BJP News : ऑपरेशन लोटसमध्ये 21 जणांची चर्चा, प्रत्यक्षात 11 जणचं गळाला : तटकरेंनी एका फोनवर घटवली भाजपप्रवेश करणाऱ्यांची संख्या

Pune News : भाजपने पुण्यात राबवलेल्या ऑपरेशन लोटसची सध्या जोरात चर्चा सुरु आहे. पण गेल्या काही दिवसांपासून भाजप पुणे शहरातील 21 इतर पक्षातील नेत्यांना प्रवेश देणार असल्याच्या चर्चा सुरू होत्या. मात्र आज प्रत्यक्ष प्रवेशावेळी फक्त 11 नेत्यांनीच प्रवेश घेतल्याचं पाहायला मिळालं. त्यामुळे ऐनवेळी प्रवेश करणाऱ्यांची संख्या का? घटली याबाबत राजकीय वर्तुळात तर्कवितर्क लढवले जात आहेत.

आगामी महापालिका निवडणुकीमध्ये भाजपने 125 नगरसेवक निवडून आणण्याचं टार्गेट निश्चित केला आहे. हे टार्गेट गाठण्यासाठी भाजपकडून मोठ्या प्रमाणात पक्षप्रवेश घडून आणण्यात येणार असल्याचं आधीपासूनच सांगण्यात येत होतं. त्यानुसार आता पहिल्या टप्प्यामधील पक्षप्रवेश पार पडले आहेत.

मात्र या पहिल्या टप्प्यातील पक्षप्रवेशांमध्ये भाजपने महायुतीतील मित्र पक्षातील नेत्यांना स्वतःकडे घेणं टाळलं असल्याचं पाहायला मिळत आहे. त्याउलट राष्ट्रवादी काँग्रेस शरदचंद्र पवार पक्ष आणि काँग्रेसमधील नेत्यांना पक्षांमध्ये प्रवेश दिला असेल तर पाहायला मिळत आहे. पहिल्या टप्प्यातील प्रवेशांमध्ये उपमुख्यमंत्री अजित पवार यांच्या राष्ट्रवादीच्या काही नेत्यांचा देखील समावेश असल्याचं सांगितलं जात होतं. त्यांचा प्रवेश देखील आज होणार होता.

मात्र उपमुख्यमंत्री अजित पवार यांच्या राष्ट्रवादी काँग्रेसचे प्रदेशाध्यक्ष असलेल्या सुनील तटकरे यांनी थेट मुख्यमंत्री देवेंद्र फडणवीस यांना फोन फिरवला आणि या सर्व प्रवेशांना ब्रेक लागला असल्याचं सांगितलं जात आहे. त्यामुळे राष्ट्रवादी काँग्रेस मधील संभाव्य प्रवेश आज टळले असल्याचं पाहायला मिळालं. मात्र हे प्रवेश शेवटच्या टप्प्यामध्ये भाजपकडून घडून आणण्याची दाट शक्यता आहे.

भाजपने पहिल्या टप्प्यामध्ये केलेल्या प्रवेशांमध्ये खास करून उपनगरांमधील नेत्यांना संधी देण्यात आली असल्याचं पाहायला मिळालं. भाजपची ताकद असलेल्या कसबा, शिवाजीनगर आणि पर्वती विधानसभा मतदारसंघांमधून भाजपने एकही प्रवेश घडून आणलेला नाही. त्या उलट उपनगरांचा भाग असलेल्या हडपसर, वडगाव शेरी आणि खडकवासला विधानसभा मतदारसंघातून महाविकास आघाडीतील मातब्बर नेते भाजपने पक्षात घेतले आहे.

एक प्रकारे उपमुख्यमंत्री अजित पवार यांच्या पक्षाची ज्या उपनगरामध्ये ताकद आहे. त्याच भागामधील नेत्यांना भाजप प्रवेश देताना पाहायला मिळत आहे. भाजपच्या या धोरणामुळे कुठेतरी अजित पवारांची राष्ट्रवादी काँग्रेस नाराज असल्याचा देखील बोलले जात आहे. हीच नाराजी प्रदेशाध्यक्ष सुनील तटकरे यांनी मुख्यमंत्री देवेंद्र फडणवीस यांच्याकडे बोलून दाखवली आणि त्यामुळे काही प्रवेशांना ब्रेक लागला असल्याचं सांगितलं जात आहे.

पहिल्या टप्प्याच्या प्रवेशांमध्ये किमान अजित पवारांच्या राष्ट्रवादी काँग्रेसचे (NCP) पाच नेते भाजपमध्ये प्रवेश करण्यास इच्छुक असल्याचं सांगितलं जात आहे. मात्र आता हे प्रवेश लांबले असून निवडणुकीच्या अंतिम टप्प्यांमध्ये हे प्रवेश होण्याची शक्यता असल्याचे सांगितले जात आहे.