Daund firing News : दौंडच्या कला केंद्रात गोळीबार : आवडीच्या लावणीवरून 2 गटात राडा, सत्ताधारी आमदाराशी संबंधित व्यक्तीचा समावेश?

Daund Firing : पुणे जिल्ह्यातील दौंड तालुक्यातील चौफुला येथील एका नामांकित कला केंद्रात गोळीबार झाल्याची घटना उघडकीस आली आहे. या घटनेत एक नृत्यांगणा जखमी झाल्याचीही माहिती आहे. गोळीबार करणारा व्यक्ती हा जिल्ह्यातीलच एका आमदारांशी संबंधित असल्याचे सांगितले जाते. कला केंद्राच्या मालकाने काहीच घडले नसल्याचे सांगितले आहे, पण सध्या पोलिसांकडून या घटनेचा तपास सुरु आहे.

या घटनेबाबत यवत पोलिस ठाण्याचे पोलिस निरीक्षक नारायण देशमुख म्हणाले की, गोळीबाराची माहिती प्राप्त झाली आहे. मात्र अद्याप काहीच सबळ पुरावा हाती लागलेला नाही. संबंधित थिएटर मालकाने काहीच घडले नसल्याचे सांगितले आहे. पण सीसीटीव्ही फुटेजनंतर माहिती समजणार आहे. लवकरच सत्य परिस्थिती बाहेर येणार आहे.

याबाबत मिळालेल्या अधिक माहितीनुसार, चौफुला परिसरात 3 कला केंद्र आहेत. गाणी, नृत्य, लावणी अशा कला इथे सादर केल्या जातात. सोमवारी रात्रीही नेहमीप्रमाणे तिन्ही कला केंद्रांमध्ये कार्यक्रम सुरु होते. मात्र दोन गटांमध्ये नृत्य सादर करण्यावरून बाचाबाची झाली. त्यातूनच गोळीबार झाला असल्याचे सांगितले जाते.

मंगळवारी सोशल मीडियावर ही बातमी वाऱ्यासारखी पसरली. अनेक तिखट प्रतिक्रिया येऊ लागल्या. त्यानंतर पोलिसांनी 2 वाजल्यापासून तपास सुरू केला. पोलिसांनी चौकशी केल्यानंतर तिन्ही कला केंद्र मालकांनी आपल्या केंद्रात असा कोणताही प्रकार घडला नसल्याचे सांगितले. त्यानंतर पोलिसांनी तिन्ही ठिकाणचे सीसीटीव्ही फुटेज जप्त करून तपास सुरु केला आहे.

स्थानिक नागरिकांनी दिलेल्या माहितीनुसार, कलेच्या नावाखाली या केंद्रांमध्ये अनेक बिभत्स प्रकार सुरु असतात. मद्यपान करुन रात्री-अपरात्रीपर्यंत धिंगाणा सुरु असतो. आपल्या आवडीचे नृत्य सादर करायला लावणे, पैसे उधळणे सुरु असते. अनेक बडे लोक इथे येतात, यात राजकीय पक्षांचे पदाधिकारी, गुन्हेगार, उद्योजकांचा समावेश असतो. पोलीस मात्र याकडे सर्रास दुर्लक्ष करतात.