Prakash Deole Passes Away : प्रतिशिर्डीचा संस्थापक हरपला, माजी आमदार प्रकाश देवळे यांचे निधन

Prakash Deole News : शिवसेनेचे माजी आमदार आणि प्रति शिर्डी शिरगावचे मुख्य विश्वस्त प्रकाश केशवराव देवळे यांचे अल्पशा आजाराने निधन झाले. ते ७७ वर्षांचे होते. त्यांच्या पार्थिवावर आज (ता. 24 सप्टेंबर) रोजी दुपारी 3.00 वा. वैकुंठ स्मशानभूमीत अंत्यसंस्कार करण्यात येणार आहेत. त्यांच्या पश्चात पत्नी, दोन मुली, जावई व नातवंडे असा परिवार आहे.

कट्टर शिवसैनिक असलेले प्रकाश देवळे हे शिवसेनेतर्फे 1996 मध्ये विलासराव देशमुख यांचा पराभव करून विधान परिषदेवर निवडून गेले. शिवसेनेचे पुणे जिल्हाप्रमुख म्हणून त्यांची कारकीर्द गाजली.

नोकरदार, बांधकाम व्यावसायिक, ऑर्केस्ट्रा कार, सिनेमा निर्माते व दिग्दर्शक, राजकारणी ते प्रतिशिर्डीचे शिल्पकार असा त्यांचा उल्लेखनीय जीवनप्रकाश होता. नुकताच त्यांना नामदेव शिंपी समाजाचा समाज भूषण पुरस्कार देऊन मंत्री चंद्रकांत पाटील यांच्या हस्ते सन्मानित करण्यात आले. अनेक संस्था आणि संघटनांशी त्यांचा जवळचा संबंध होता.