Ajit Pawar : ‘माळेगाव’साठी मी उमेदवारी अर्ज भरला, तर तुमच्या पोटात का दुखते? अजितदादांचा विरोधकांना खडा सवाल

Baramati, 02 June : माळेगाव सहकारी साखर कारखान्याच्या निवडणुकीसाठी उमेदवारी अर्ज दाखल केल्यानंतर उपमुख्यमंत्री अजित पवार यांच्यावर विरोधक रंजन तावरे आणि सहकाऱ्यांकडून टीका केली जात होती. त्याला उपमुख्यमंत्री अजित पवार यांनी सडेतोड उत्तर दिले आहे. ‘मी कोठे उमेदवारी अर्ज दाखल करायचा, हा माझा अधिकार आहे. तुमच्या पोटात का दुखते?’ असा सवाल करत ‘मी कोणावर टीका करणार नाही. पण, माझ्यावर कोणी चुकीचे आरोप केले, तर मी शांत बसणार नाही, असा इशारा अजितदादांनी विरोधकांना दिला.

माळेगाव सहकारी साखर कारखान्याच्या निवडणुकीच्या (Malegaon Sugar Factory Election) पार्श्वभूमीवर उपमुख्यमंत्री अजित पवार यांनी आज बारामतीत पत्रकार परिषद घेतली, त्यात त्यांनी विरोधकांनी उपस्थित केलेल्या विविध प्रश्नांना सडेतोड उत्तरे दिली. तसेच, काही मुद्यांवर इशारा देताना खडे बोल सुनावले. माळेगाव साखर कारखान्यात मी लक्ष घालण्याची गरज नव्हती, असा मुद्दा रंजन तावरे आणि सहकारी मांडत आहेत. पण, मी कोठे उमेदवारी अर्ज भरायचा, हा अधिकार माझा आहे. त्यामुळे तुमच्या पोटात का दुखते?, असा सवालही अजित पवारांनी केला.

कोणी कर्ज काढून नियमानुसार कारखाने उभारत असतील. ते आपल्या सभासदांना चांगला भाव देत असतील, तर त्यात चुकीचे काय आहे? जबरदस्तीने कोणी त्यांना ऊस घालत नाही. ते स्वतःहून ऊस घालत असतात. त्यामुळे माळेगाव साखर कारखान्याच्या निवडणुकीत पवार कुटुंबीयांवर आरोप करणे चुकीचे आहे, असेही अजित पवार (Ajit Pawar) यांनी विरोधकांना सुनावले.

कोणावरही मी टीका करणार नाही, पण, कोणी माझ्यावर चुकीचे आरोप केले, तर शांत बसणार नाही, असे सांगून विरोधकांनी केलेल्या आरोपांना दिलेल्या उत्तराच्या प्रती सभासदांना वाटण्याची सूचनाही त्यांनी कारखान्याचे अध्यक्ष केशवराव जगताप आणि माजी अध्यक्ष बाळासाहेब तावरे यांना दिल्या आहेत.

माळेगाव सहकारी साखर कारखान्याच्या वीस हजार सभासदांच्या प्रपंचाचा विषय माझ्यासाठी मोठा आहे, त्यामुळे मी माळेगावची निवडणूक लढविण्याचा निर्णय घेतला आहे. कारखान्याच्या संचालक मंडळात मी असेन तर सर्वच विषय वेगाने मार्गी लागतील. मी शब्द टाकला तर मदतीसाठी कोणीही नाही म्हणणार नाही. त्यातून कारखाना परिसरातील अनेक कामे मार्गी लागतील, असे ही अजित पवारांनी स्पष्ट केले.