Hake vs Bhujbal : छगन भुजबळांचा 'तो' दावा लक्ष्मण हाकेंनी खोडला; आवाहन करत म्हणाले, 'आमनेसामने बसा पुराव्यानिशी...'

OBC Reservation : ओबीसीमध्ये मराठा समाजाची घुसखोरी होत आहे, असा आरोप केला जात होता. लक्ष्मण हाकेंनी केलेल्या या आरोपाबाबत बोलताना ओबीसी नेते, मंत्री छगन भुजबळ म्हणाले होते की, ओबीसींच आरक्षण काही संपलेलं नाही.

भुजबळांच्या वक्तव्यानंतर लक्ष्मण हाके यांनी थेट त्यांना समोरसमोर बसण्याचे आवाहन केले आहे. हाके म्हणाले, 'भुजबळसाहेब आमचे नेते आहेत, मात्र त्यांना एक प्रश्न विचारतो, महाराष्ट्रात 22 लाख कुणबी प्रमाणपत्रे वाटल्याचा दावा आहे.

'एवढ्या मोठ्या संख्येने मराठा समाज ओबीसीमध्ये आल्यास मूळ ओबीसी समाज स्पर्धेत टिकेल का? त्यांनी आमने-सामने बसावं, पुराव्यानिशी सरकारला आरक्षणाची सद्यस्थिती दाखवून देऊ.', असे आवाहन देखील हाके यांनी केले.

27 टक्के आरक्षण मूळ ओबीसींसाठी आहे.मोठ्या संख्येने मराठा समाज ओबीसीमध्ये समाविष्ट झाल्यास मूळ ओबीसी स्पर्धेत टिकेल का? ओबीसींना आरक्षणाचा लाभ मिळणार नसेल तर हे आरक्षण काय कामाचं?'' असा सवाल देखील त्यांनी उपस्थित केला.

ओबीसी नेत्यांमध्ये फूट?

भुजबळ मंत्री असल्याने त्यांच्यावर सत्ताधाऱ्यांची भूमिका घेण्याचा दबाव आहे का? असा सवाल देखील हाके यांनी उपस्थित केला. भुजबळांचा ओबीसी मोर्चाला पाठींबा नसल्याची चर्चा होती. त्यातच 1 सप्टेंबरला भटक्या-विमुक्त आणि ओबीसींचा मोर्चा मुंबईच्या दिशेने जाणार, असे हाके म्हणाले. त्यामुळे ओबीसी नेत्यांमध्ये फूट पडल्याची चर्चा आहे.

सरकारवर निशाणा

मंत्री उदय सामंत हे लक्ष्मण हाकेंना भेटणार असल्याचे सांगितले जात होते. त्यावर बोलताना ते म्हणाले, “उद्योगमंत्र्यांनी आम्हाला भेटावं, अशी आमची अपेक्षा नाही. सरकारच्या निर्णयामुळे महाराष्ट्रात 22 लाख कुणबी प्रमाणपत्रे वाटल्याचा दावा आहे. या स्पर्धेत मूळ ओबीसींचे काय झालं, हे सरकारने सांगावं. सामाजिक न्यायाच्या प्रतीक्षेत असलेल्या ओबीसींच्या स्थानिक प्रतिनिधित्वावर परिणाम झाला आहे का?' असा सवाल देखील त्यांनी उपस्थित केला.